اسلام آباد۔ 19 فروری (اے پی پی) پاکستان بھارت نا کنڈآن پاکستان ءِ دھڑکو تار داٹ بے چیٹی تا چٹفنگ کن اقوام متحدہ آن نیام تمنگ نا خواست کرسا پارینے کہ بھارت بے جاست وپاست پلوامہ جلہو نا دوبہ ءِ پاکستان آ خلسا تینا داخلی مسخت آتا رداٹ پاکستان دشمن بیان تیان ڈیہہ نا چاگڑد ءِ بے چیٹ کننگ ءِ۔ داہیت ءِ وزیر خارجہ شاہ محمود قریشی اقوام متحدہ نا سیکرٹری جنرل انٹونیو گوئٹریش و سلامتی کونسل نا باسک آتا پن چھٹی اسے ٹی پارینے۔ تینا چھٹی ٹی وزیر خارجہ پارے کہ بھارت سندھ طاس معاہدہ ءِ چٹفنگ نا دھڑکو تس ہرا بھاز بھلو غلطی اس مریک۔ اوپارے کہ بے چیٹی نا چٹفنگ کن اقوام متحدہ نا دمدستی نیام تمنگ المی ءِ۔ وزیر خارجہ شاہ محمود قریشی پارے کہ بھارت بے جاست وپاست پلوامہ جلہو نا دوبہ ءِ پاکستان آ خلنگ ءِ۔ اوپارے کہ بھارت تینا داخلی مسخت آتا رداٹ پاکستان دشمن بیان تیان ڈیہہ نا چاگڑد ءِ بے چیٹ کننگ ءِ، بھارت نا رداٹ جلہو گیر کشمیری اس ئس ولے اونا باوجود بھارت دوبہ ءِ پاکستان آ خلک۔ داکان بیدس وزیر خارجہ مخدوم شاہ محمود قریشی بھارت اٹی پاکستان نا ہائی کمشنر سہیل محمود تون اوڑدہی کرے و اوڑتون پلوامہ معاملہ غا، بھارت نا کنڈآن پاکستان آ خلوک آ بے جا دوبہ و ڈیہہ نا جم حالیت آتا بابت گپ و تران کرے۔ وزیر خارجہ پارے کہ پاکستان، ڈیہہ ٹی امن نا خواہندار ءِ بدامنی و ہیجان انگیزی ہچ کس نا فائدہ ٹی اف۔ اوپارے کہ نن دا حالیت آتا سنجیدگی و خوڑتی اٹ جاچ ءِ ہلنگ اُن و ای غٹ حالیت آتیان بذریعہ چھٹی سیکرٹری جنرل اقوام متحدءِ معلومدار کرینٹ۔ یات سلے کہ پاکستان بھارت اٹی پاکستانی ہائی کمشنر سہیل محمود ءِ سلابت کن درو اسلام آباد آ بٹنگاسس۔
