اسلام آباد۔ 18فروری(اے پی پی) صدر ڈاکٹر عارف علوی ءَ گشتگ کہ پاکستان ءُ سعودی عرب ءِ حکومت وتی وتی ملک آنی دیمروئی ءُ وشحالیءِ ھاترءَ یک وڑیں حیالءُ لیکہ ءِ واہند اَنت۔ آ دوشمبے ءِ روچءَ ایوان صدرءَ سعودی ولی عہد محمد بن سلمان ءِ شرپءَ نیمروچءِ نان ءِ بندوبست کتگءُ ہڈ داتگیں مراگشءَ گوں تران کنگءَ بوتگ۔ مزن وزیر عمران خان، فوجی سروک، سفارت کار ءُ مزنیں حکام ہم اے موہ ءَ ساڑی بوتگ اَنت۔ آئیءَ گشتگ کہ دوئیں ملک وت مہ وت ءَ براتءُ سنگت اَنت۔ صدرءَ اے اُمیتءِ درشانی کتگ کہ اے سیادیءُ سنگتی ہر وڑیں چکاسءَ سوبمند بیت۔ آئیءَ گشتگ کہ دوئیں ملک آنی نیام ءَ جغرافیائی دور اَست بلے دوئینانی دل نزیک اَنت۔ صدرءَ سیلءُ سواد ءِ ہوالگءَ سعودی حکومتءِ ویژن 2030ءُ ملک ءَ نوکیں ترزءُ نوکیں رھبند دیما آرگ ءِ عملءَ ساڑاتگ۔ ایشی ءَ ابید آرمی ءِ یک بینڈے ءَ بازیں گیدی سوتانی تھر پیش کتگ کہ سعودی ولی عہد شہزادہ محمد بن سلمان ءُ آئیءِ ڈل ءَ باز دوست کتگءُ ساڑاتگ۔ صدر ڈاکٹر عارف علوی ءُ مزن وزیر عمران خان ہم اے موہ ءَ ساڑ ی بوتگ۔ ایشی ءَ پد ملک ءِ صدر عارف علوی ءَ ایوان صدر ءِ بنجاہی دروازگ ءَ ہاسیں مہمان ءَ را راہ داتگ۔ مزن وزیر عمران خانءَ سعودی ولی عہد شہزادہ محمد بن سلمان ءِ ہمرائی ءَ ایوان صدرءَ چہ نورخان ایئربیس ءَ گاڑی وت چلائنتگ۔
