اسلام آباد۔ 18 فروری (اے پی پی) وزیر خارجہ شاہ محمود قریشی پارینے کہ پاکستان و برطانیہ نا نیام اٹ واپار ، زرکاری و تعلیمی بشخ اٹی کمکاری ءِ مون آ دننگ نا گرج ءِ ۔ داخیال آتا درشانی ءِ او برطانیہ نا وزیر مملکت دولت مشترکہ و اقوام متحدہ آفس لارڈ احمد آف ومبلڈن تون اوڑدہی ٹی گپ و تران کرسا کرے۔اوڑدہی ٹی پاکستان و برطانیہ نا نیام اٹ رابطہ غاتا ساڑی آ حالیت آتیا است جمی نا درشانی ءِ کننگا۔ ہڑتوم آ راہشونک چندی بشخ آتے ٹی تعلقداری تے مون آ دننگ آ امنا ظاہر کریر۔ وزیر خارجہ پاکستان اٹی جان جوڑی و تعلیم نا بشخ اٹی برطانیہ نا محکمہ جہانی کمکار(ڈی ایف آئی ڈی) نا کمکاری نا اعتراف ءِ کرے۔ وزیر خارجہ برطانیہ ٹی رہینگوک آ پاکستانی تا خذمت خاص کر ہڑتوم آ ملک آتا الس نا نیام اٹ رابطہ غاتامون آ دننگ کن پاکستانی کمیٹی نا کڑد انا ستاءِ کرے۔ اوبرطانیہ نا وزیر مملکت ءِ پاکستان اٹی سیل وسوات نا بشخ اٹی ساڑی کاریم نا کچ و دابشخ انا مون آ دننگ کن پاکستان نا گام گیج آتا بارواٹی معلومدار کرے۔ اوبرطانیہ نا وزیر مملکت ءِ مقبوضہ کشمیر اٹی بھارتی سیکورٹی فورس آتا انسانی حق انا سنگین لتاڑنگ نا بارواٹ ہم معلومدار کرے۔ لارڈ احمد راجی و اقتصادی بشخ آتے ٹی حکومت نا اصلاحات نا ایجنڈا نا ستاءِ کرے و ملک اٹی سلامتی نا حالیت آتے ٹی گچینی نا اعتراف ءِ کرے۔ او وزیر خارجہ ءِ بریگزٹ آن پد انا منظر نامہ ٹی واپار نا حالیت و گمان تا بارواٹ ہم پارے وپارے کہ برطانیہ دا رداٹ پاکستان تون کمک ءِ برجاتخک۔ لارڈ احمد سائبر سیکورٹی ، چاگڑد و انسانی حق انا بشخ آتے ٹی پاکستان و برطانیہ نا نیام اٹ اقوام متحدہ و دولت مشترکہ تون اوار کثیر الجہتی فورم تیا کمکاری ءِ مون آ دننگ نا گرج آ زور شاغا۔ لارڈ احمدپاکستان و برطانیہ نا نیام اٹ تعلقداری تے پین ودفنگ کن پاکستان نا حکومت و برطانیہ ٹی رہینگوک پاکستانی کمیونٹی تون خڑکی کاریم کننگ نا استخواہی نا درشانی ءِ کرے۔
