اسلام آباد۔ 17 فروری (اے پی پی) سعودی عرب نا ولی عہد شہزادہ محمد بن سلمان نا جہاز ہندن کہ پاکستانی چاگڑدی دنگ اٹ پترینگا تو پاک فضائیہ نا جہاز آک شایان شان اودے بخیر کریر۔ پاک فضائیہ نا میڈیا ڈیپارٹمنٹ نا کنڈآن جاری پریس ریلیز نا رداٹ پاک فضائیہ نا ایف 16 و جے ایف 17 تھنڈر جہاز آک شاہی جہاز ءِ تینا سیبو ٹی ہلکر و شرفمندآ مہمان نا جہاز انا دامون و ایمون فارمیشن اٹی بال کرسا اودے بحفاظت مزل مقصود اسکان سرکریر۔ سعودی ولی عہد شہزادہ محمد بن سلمان یک شنبے نادے آ اِرادے ئی سرکاری دورہ غا پاکستان آ بسنے۔ ہندن کہ شرفمند آ مہمان نا جہاز پاکستانی چاگڑدی دنگ اٹ پترینگا پاک فضائیہ نا ایف 16 فالکن و جے ایف 17 تھنڈر جہاز آک نور خان ایئر بیس آ لینڈنگ اسکان رائل جہاز ءِ فارمیشن نا دروشم اٹ تینا سیبو ٹی ہلکوسر۔ پاکستان نا سرکاری دورہ غا بروک آ برادر ملک آتا سرکڑدہ غاتے داوڑاٹ بخیر اٹ پاننگ نا دا پاکستان و پاک فضائیہ نا درخشاں و اسٹ ءُ روایت اسے ہرادے برقرار تخنگا۔
