اسلام آباد۔ 17 فروری (اے پی پی) وزیراعظم عمران خان و سعودی ولی عہد شہزادہ محمد بن سلمان نا ساڑی گری ٹی پاکستان و سعودی عرب نا نیام اٹ چندی بشخ آتے ٹی کمکاری و زرکاری نا 20 ارب دالر زمالیت نا 7 معاہدہ و مفاہمت نا یات داشت آتیا دستخط کننگا۔ دستخط نا دود یک شنبے نادے آ وزیراعظم ہاؤس اٹی اڈ ہلک۔ پاکستان و سعودی عرب نا نیام اٹ سٹینڈ رڈائزیشن نا بشخ اٹی کمکاری نا معاہدہ غا دستخط کننگا۔ سعودی عرب نا وزیر واپار ڈاکٹر ماجد القاسمی و وزیر خارجہ شاہ محمود قریشی معاہدہ غا دستخط کریر۔ گوازی تا بشخ اٹی کمکاری نا معاہدہ غا سعودی عرب نا وزیر خارجہ عادل الجبیر و بنجائی وزیر بین الصوبائی رابطہ، امور نوجوانان و گوازی ڈاکٹر فہمیدا مرزا دستخط کریر، سعودی گڑاتا درآمد نا بابت مالیاتی معاہدہ غا وزیر خزانہ اسد عمر و سعودی عرب نا وزیر خارجہ عادل الجبیر سعودی فنڈ شونداری نا کنڈآن دستخط کریر۔ توانائی نا پیدوار نا فریم ورک نا مفاہمتی یات داشت آ وزیر خزانہ اسد عمر و سعودی عرب نا وزیر خارجہ عادل الجبیر دستخط کریر۔ ہڑتوم آ ملک آتا نیام اٹ معدنی وسیلہ غاتا شونداری ٹی کمکاری نا مفاہمت نا یات داشت آ ہم دستخط کننگا۔ سعودی وزیر توانائی خالد الفالح و بنجائی وزیر پٹرولیم غلام سرور خان معاہدہ غا دستخط کریر۔ ہڑتوم آ ملک آتا نیام اٹ قابل تجدید توانائی نا بشخ اٹی کمکاری و زرکاری نا معاہدہ پک مس ہراڑا سعودی وزیر توانائی خالد الفالح و وزیر توانائی عمر ایوب خان دستخط کریر۔ داوخت آ وزیر اطلاعات و نشریات فواد چوہدری، زرکاری بورڈ انا چیئرمین ہارون شریف ، سیکرٹری خارجہ تہمینہ جنجوعہ ، سعودی وزراء و مہمان ڈل انا باسک آک ہم ساڑی ئسر۔ دا معاہدہ غاتیان ہڑتوم آ ملک آتا نیام اٹ تعلقداریک پین سوگو مریرہ۔ سعودی ولی عہد شہزادہ محمد بن سلمان تینا ڈل اتون اوار اِرادے ئی دورہ غا یک شنبے نادے آ پاکستان آ سرمسنے ہرانا پاکستان آ بننگ آ فقید المثال بیا بخیر ءِ کننگا۔
