اسلام آباد۔ 17 فروری (اے پی پی) وزیراعظم عمران خان و سعودی ولی عہد محمد بن سلمان نا نیام اٹ یک شنبے نا نن وزیراعظم ہاؤس اٹی اوڑدہی مس۔ اوڑدہی آن پد وزیراعظم و ولی عہد نا اسیجا کماشی ٹی سپریم کوآرڈینیشن کونسل نا بنائی دیوان اس اڈ ہلک۔ بڑزکو اختیاراتی سپریم کوآرڈینیشن نا ٹہیفنگ نا سلاہ وزیراعظم عمران خان نا اکتوبر 2018 ء ٹی سعودی عرب نا دورہ ٹی ولی عہد شہزادہ محمد بن سلمان پیش کریسس۔ کونسل نا مسخت ہڑتوم آ کنڈآتا کمکاری نا کلیدی بشخ آتے ٹی ترند تر فیصلہ و اوفتیا عملدرآمد نا بغور چاروکی کن بڑزکو کہول نا ادارہ جاتی نظام اس جوڑ کروئی ئس۔ کوآرڈینیشن کونسل اٹی ہڑتوم آ ملک آتا تعلقدار وزیر خارجہ امور، دفاع، دفاعی پیداوار، خزانہ، توانائی ، پٹرولیم، آبی وسیلہ، اطلاعات و دودوربیدگ، داخلہ، واپار و زرکاری و انسانی وسیلہ غاک اوار ءُ۔ دا کونسل سیاسی و سلامتی، اقتصادی ، راجی و دودوربیدگی نا مسہ اہم بشخ آتیا محیط مریک۔ پاک سعودیہ سپریم کوآرڈینیشن کونسل نا رداٹ مخصوصی شعبہ جات اٹی کمکاری نا فریم ورک اس جوڑ کننگ و تعلقدار وزیر آتے سلاہ و سوج پیش کننگ کن وزارتی و سینئر کمامدارآتا کہول آتیا سٹیرنگ کمیٹی و جائنٹ ورکنگ گروپ اس جوڑ کننگانے۔ ہڑتوم آ ملک آتا وزراء خارجہ سپریم کورٹ کونسل نا امور کار اٹی رابطہ کاری نا فرض ءِ انجام ایترہ۔ سپریم کونسل نا دیوان ریاض و اسلام آباد اٹی واری واری سالانہ بنداو تیا اڈ ہلیک۔
