اسلام آباد۔ 17 فروری (اے پی پی) وزیراعظم عمران خان پارینے کہ سعودی عرب نا سرکڑدہ و الس نئے بیرہ مکہ و مدینہ نا سوب آن ننا است آتے ٹی رہینگرہ بلکن سعودی عرب ننا عظیم دوست ءِ ہراہر مشکل وخت اٹی ننتون سلیسونے و گچین دوست ثابت مس، یک شنبے نادے آ داڑے وزیراعظم ہاؤس اٹی سعودی ولی عہد شہزادہ محمد بن سلمان نا دورہ پاکستان نا وخت آ شرفمندآ مہمان و اونا ڈل انا شرف اٹی شام انا اِرغ آن تران کرسا وزیراعظم سعودی ولی عہد ، وزراء و ڈل اٹی اوار ایلو مہمان تا منت واری ءِ ہرفسا اوفتے پاکستان اٹی ببوخیراٹ پارے۔ اوپارے کہ شش تُو مست ہراتم ای وزیراعظم نا حیثیت اٹ مکہ و مدینہ غا ہناٹ و ہمو وخت آ ای خانہ کعبہ و روضہ رسول ؑ نا تہٹی ہنسا حاضری تسٹ ہرا کنا زند انا جوان ءُ موقع اس ئس داڑا ای جندی وڑاٹ منت واری ءِ ہرفیوہ۔ اوپارے کہ سعودی عرب ننا خراب انگا معاشی حالیت آتے ٹی کمک ءِ کرے ہرا ستاکڑزک۔ وزیراعظم عمران خان پارے کہ پاکستان و سعودی عرب نا تین پہ تینی تعلقداریک کیہی دہائی تیا تالان ءُ ولے نن دا تعلقداری تے پوسکن آ بڑزی تسکان دننگ خوانہ۔ اوپارے کہ پاکستان اٹی سعودی زرکاری و شریداری آن ننا تین پہ تینی تعلقداریک پین سوگو مریرہ۔ اوپارے کہ پاکستان نا معدنیات نا بشخ اٹی زرکاری نا بھلو وارخواہی اس ارے وخت اس کہ سیل و سوات نا بشخ انا بابت کنا سعودی ولی عہد تون وزیراعظم ہاؤس آ برسا گاڈی ٹی سرجم ہیت وگپ مسنے۔ اوپارے کہ سعودی عرب آنبار پاکستان ہم سیل و سوات نا بشخ آ خصوصی چکار کننگ ءِ۔ سعودی عرب اٹی داوخت آ 80 ملین سیل وسواتی بریرہ ہرافتا کچ سعودی عرب 100 ملین اسکان ودفنگ خواہک۔ اوپارے کہ پاکستان اٹی ہم سیل وسوات نا بشخ ترندی اٹ شون ہلنگ ءِ و نن سعودی عرب آن سیل وسوات نا اسہ بشخ اسے ٹی مون آٹی اُن انتئے کہ داڑے مشی آ سیل وسوات نا بھلو جاگہ ارے ۔ اوپارے کہ پیٹرو کمیکلز ، معدنیات، کشت وکشار و کن خور نا پراسیسنگ نا بشخ آتے ٹی تین پہ تینی کمکاری ءِ مون آ دننگ آن ہڑتوم آ ملک آتا تعلقداری تیٹی پین وسعت بریک۔ وزیراعظم پارے کہ نن سی پیک نا رداٹ دنیا نا بھلا مارکیٹ چین تون گنڈنگ انگ اُن، و ای سعودی عرب ءِ داٹی شریداری نا سلہ خلیوہ۔ اوپارے کہ ای ولی عہد نا مرغن ءُ دورہ سے نا خواہش تخاٹہ ولے سیکورٹی ویل آتا سوب آن او اِرادے ئی دورہ کننگ ءِ۔ داوخت آ وزیراعظم پارے کہ پاکستان آن سعودی عرب حج اکن ہنوک آ پاکستانی تا پاکستان اٹی امیگریشن نا موکل تننگے۔ اوخصوصی وڑاٹ سعودی عرب اٹی کاریم کروک آ پاکستانی کارندہ غاتے کن آسراتی تا ذکر ءِ کرسا پارے کہ سمندر پار کاریم کروک آ دا بندغ آک کنکن بے کچ اسپیشل ءُ ہراکنا است اٹی رہینگرہ۔ اوپارے کہ دا تینا رشتہ دار و چناتیان مر کاریم کرسا پاکستان اٹی زرمبادلہ گدریفرہ۔ اوولی عہد آن خصوصی خواست کرے کہ او مخصوص و بے کچ اہم خلقت کن آسانی ودی کننگے انتئے کہ او تینا اُراءِ و اہل و عیال ءِ ہلسا کاریم کننگ ءُ۔ شام انا اِرغ نا دود آن تران کرسا سعودی ولی عہد محمد بن سلمان پارے کہ سعودی عرب وپاکستان برادر و سنگت ملک ءُ ہرا مشکل حالیت آتے ٹی مدام اسہ ایلو تون تفینو۔ اوپاکستان و اونا سرکڑدہ ہی ءِ عظیم گوندا و پارے کہ نن باور کینہ کہ آخبت اٹی پاکستان اسہ اہم ءُ ملک اس جوڑ مرسا مون آ بریک۔ اوپارے کہ ننے اواری اٹ بھاز گڑا کروئی ءِ۔ اینو اولیکو مرحلہ ٹی 20 ارب ڈالر نا زرکاری نا معاہدہ کننگانے ہراٹی پین ودکی مریک۔ اوپارے کہ سیل و سوات نا بشخ آ ہم کنا وزیراعظم عمران خان تون گپ و تران مسنے و اوپارے کہ او سیل و سوات نا مون آ دننگ کن کاریم کننگ ءِ۔ اوپارے کہ سعودی عرب اٹی سیل وسوات نا ساڑی آ کچ 80 ملین ءِ ہرادے 100 ملین اسکان ودفنگ خوانہ۔ اوپارے کہ سعودی عرب سیل وسوات نا کچ اٹی بروک آ منہ سال اٹی پنجا ملین نا پین ودکی کیک۔ اوپارے کہ نن نئے بیرہ تین پہ تینی شونداری و سوگوی کن کاریم کینہ بلکن پاکستان و سعودی عرب اواری اٹ علاقائی و ڈیہہ نا شونداری ٹی ہم کڑد ادا کننگ کیرہ۔ اوپارے کہ ولی عہد جوڑ مننگ آن پد ای غٹ آن مست پاکستان نا دورہ ءِ کرینٹ۔ وزیراعظم عمران خان نا کنڈآن سعودی عرب اٹی کاریم کروک آ کارندہ غاتا آسراتی نا بابت اوپارے کہ نن سعودی عرب اٹی کاریم کروک آ پاکستانی تے کن ہروڑنا آسراتی فراوان کینہ۔ اِرغ اٹی وزیراعظم عمران خان ، سعودی ولی عہد شہزادہ محمد بن سلمان ، پاکستان و سعودی عرب نا وزیر آک، چیف آف آرمی اسٹاف جنرل قمر جاوید باجوہ تون اوار سعودی ڈل اٹی اوار بڑزکو کمامدارآک ہم ساڑی ئسر۔
