اسلام آباد۔ 18 فروری (اے پی پی) واپار نا بارواٹی وزیراعظم نا سلاہکار عبدالرزاق داؤد پارینے کہ پاکستان نا شرح نمو و معیشت نا شونداری کن سعودی عرب نا زرکاری بے کچ اہمیت تخک۔ دوشنبے نادے آ اسلام آباد نا ہندی ہوٹل اٹی پاک سعودی عرب بزنس کانفرنس آن تران کرسا اوپارے کہ سعودی عرب شونہالی نا سفر اٹی پاکستان نا شریدار ءِ۔ عبدالرزاق داؤد پارے کہ سعودی زرکار آتا کنڈآن کانڑ کنی و معدنیات نا بشخ آتے ٹی زرکاری بے کچ اہم ءِ۔ اوپارے کہ سعودی عرب تون ننا تعلقداریک جتا سمت و جتا کہول آ مون آ ہِننگ ءُ، پاکستان نا چندی بشخ آتے ٹی سعودی عرب نا کنڈآن بھلو کچ اسے آ زرکاری نا پڑو آن ننا معیشت اٹی گچینی بریک۔ اوپارے کہ سعودی عرب نا زرکار و پوریا گر آتے اوفتا کاروباری ڈٹ آتے ٹی ہروڑنا آسراتی تننگک۔ اوپارے کہ سعودی ولی عہد شہزادہ محمد بن سلمان نا ساڑی آ دورہ پاکستان نا موقع غا اولیکو مرحلہ ٹی آئل ریفائننگ ، پیٹرو کیمیکل تون اوار ایلو چندی بشخ جاٹ آتے ٹی 20 ارب ڈالر آن زیات نا زرکاری کن معاہدہ و مفاہمت نا یات داشت آتیا ہڑتوم آ ملک آک دستخط کرینو ہراڑان پاکستان اٹی زرکاری نا بابت جہانی زرکار آتا پت اٹی ودکی مریک و پاکستان اٹی کروک آ براہ راست درملکی زرکاری ءِ مون آ دننگ دوئی مریک۔ واپار نا بارواٹی سعودی عرب نا وزیر ماجد الکسابی داوخت آ پارے کہ پاکستان و سعودی عرب نا تعلقداریک اسہ پوسکن ءُ و مثبت سمت اٹی مون آ ہِننگ ءُ۔ اوپارے کہ ہڑتوم آ ملک آتا اقتصادی کمکاری ءِ مون آ دننگ آن معاشی شونداری نا ہدف آتا دوئی کننگ اٹ کمک رسینگک۔ پاک سعودی عرب بزنس کانفرنس آن زرکاری بورڈ انا چیئرمین/وزیر مملکت ہارون شریف ئسک ہم تران کریر و سعودی عرب نا واپاری ڈل ءِ پاکستان اٹی بخیر اٹ پاننگ تون اوار اوار ملکی معیشت نا چندی بشخ آتے ٹی زرکاری نا دوئی وارخواہی تیان ہم معلومدار کریر۔ سیکرٹری سردار احمد نواز سکھیرا ہم دود آن تران کرے و درملکی زرکاری آن دوئی مروک آ کٹیا تا گدریفنگ نا پورو آجوئی ءِ۔ اوسعودی زرکارآتے ملک اٹی ہندی و درملکی زرکاری ءِ مون آ دننگ و زرکارآتے تروک آ آسراتی تا بارواٹ سرجمی اٹ معلومدار کرے۔ کانفرنس اٹی بشخ ہلوک آ سعودی زرکارآک توانائی، کشت وکشار، سیل و سوات تون اوار قومی معیشت نا چندی بشخ آتے ٹی زرکاری ٹی بھاز است خواہی نا درشانی ءِ کریر۔
