اسلام آباد۔ 17 فروری (اے پی پی)سعودی ولی عہد شہزادہ محمد بن سلمان دو روچی تر ءُُ تاب ءِ ھاترا سلام آباد ءَ پُج ات۔ سعودی ولی عہد ءِ جہاز یک شمبے ءِ بیگاہ ءِ 8ھشت کلاک ءِ نزیک ءَ اسلام آباد ءِ نور خان ائیر بیس ءِ سر ءَ نشت آھودا آئی ءَ را مزن وزیر عمران خان ءَ وش اتک کت۔ پاک اُرد ءِ سروک جنرل قمر جاوید باجوہ ءَ ھوار اُردی سروک ھم اے موہ ءِ سر ءَ ساڑی اتنت۔ سعودی ولی عہد انچو کہ جہاز ءَ چہ ایر کپت گڈا مزن وزیر عمران خان دیم ءَ شت ءُُ آئی ءَ را وش اتک ءِ کت۔ اے موہ ءِ سر ءَ پاکستان ءِ دود ءُُ ربیدگی پوشاک آنی تہ ءَ زھگ آں شہزادہ محمد بن سلمان ءَ را پُل آنی ٹوکری دات۔ سعودی ولی عہد مزن وزیر ءِ ھمبراھی ءَ لاؤنج ءَ شت۔ سعودی ولی عہد ءَ را پاکستان ءَ آیگ ءِ پد ءَ 21ٹوپ آنی سلامی دیگ بوت۔ سعودی ولی عہد محمد بن سلمان ءِ ھمراھی ءَ سعودی شاہی ھاندان ءِ مردم، کلانہ ایں وزیر، سرمایہ کار، سعودی کمپنی آنی ٹوھیں کارندہ ءُُ ایندگر بازیں پرسنالٹی پاکستان ءَ اتکگ اَنت۔ ایشی ءَ چہ پد سعودی ولی عہد محمد بن سلمان مزن وزیر عمران خان ءِ ھمبراھی ءَ مزن وزیر کارگس ءَ روادگ بوت آھودا آ مزن وزیر ءَ گوں ون آن ون گند ءُُ نند کنت انت۔
