پشاور۔ 15 فروری (اے پی پی) مزن وزیر عمران خان ءَ گوشت کہ قبائلی ضلع آں چہ گریبی ءِ ھلاسی ءُُ ایشانی دیمروئی حکومت ءِ اولی ترجی اِنت، جان سلامتی انصاف کارڈ گریبیں گس آنی واستہ نادُراھی ءِ وھد ءَ ٹوھیں کمک اِت، بزگری ءِ ھلاسی پروگرام ءِ بنگیج ھمے ماھ ءَ کنگ بیت، مشکلیں وھد ءَ یک رنگے ءَ در کپتگ آں، سعودی ولی زمانگ ءِ ھمبراھی ءَ ٹوھیں ڈل ءِ آیگ ءَ چہ ملک ءَ سرمایہ کاری کئیت۔ آ آدینگ ءِ روچ ءَ خیبر پختونخوا ءَ ھوار کتگیں قبائلی ضلع آنی الس آنی واستہ جان سلامتی انصاف کارڈ ءِ بنگیجی مراگش ءَ گوں گشتانک دیان ءَ کت۔ مزن وزیر ءَ گوشت کہ آ قبائلی دمگ آنی الس ءِ واستہ وتی کتگیں سوگند آں زوت پیلو کنگ ءِ پد ءَ سک باز وش ءُُ گل اِنت، قبائلی دمگ آنی مردم سرجمیں پاکستان ءَ گریب آنی گوما وانگ ءُُ زانگ، جان سلامتی ءُُ ھمک رنگ ءِ چاگردی ٹک آنی رد ءَ پشت ءَ پشت کپتگ بوتگ اَنت وھدیکہ ناشرکاری ءُُ ایشی ءِ ھلاپ ءَ جنگ ءَ چہ گوستگیں دھ دوھازدھ سال ءَ ھرچی تاوان رستگ مرچی کمو گہتر اَنت۔ مزن وزیر ءَ گوشت کہ ما پیسلہ کتگ بوتگ کہ ما اے ملک ءَ گریب آنی واستہ ھرچی کناں ایشی ءِ بندات قبائلی دمگ آں چہ کناں۔ ما لس مردم ءِ گہتری ءِ واستہ سک باز پروگرام آرگ آں، ہیلتھ کارڈ ھمے پروگرام آنی بھر اِنت ایش گریبیں مردم آنی واستہ نعمت اِت۔ آئی ءَ گوشت کہ وھد ءِ یک گسے ءِ توک ءَ نادُراھی کئیت گڈا ایشی ءِ مشکل باز بنت ءُُ نا دُراھی ءِ ھلاس کنگ ءِ واستہ دوا ءُُ درمان ایشی ءِ سرجمیں کٹ ءَ را چٹ انت ءُُ ھلاس کن اَنت۔
