اسلام آباد۔ 15 فروری (اے پی پی) سعودی عرب نا ولی عہد شہزادہ محمد بن سلمان وزیراعظم عمران خان نا سلہ غا (اینو) ہفتہ نادے آ پاکستان نا اِرادے ئی دورہ غا سرمریک۔ وزیراعظم عمران خان و کابینہ نا سینئر باسک آک سعودی ولی عہد ءِ ایئر پورٹ آ بخیر کیرہ۔ سعودی ولی عہد نا پاکستان آ بننگ آ فقید المثال خیرمقدم ءِ کننگک و اودے 21 توپ آتا سلامی تننگک ۔ سعودی ولی عہد نا دورہ ٹی سیکورٹی نا سخت و فول پروف بست و بند ءِ کننگانے۔ اپریل 2017 ء ٹی ولی عہد نا منصب آ فائز مننگ آن پد دا شہزادہ محمد بن سلمان نا پاکستان نا ریاستی کہول آ اولیکو دورہ مریک ۔ اوڑتون اوار سعودی شاہی خاہوت نا باسک آک، کلیدی وزیر آک و پنی آ کاروباری شخصیت آتون اوار بڑزکو اختیاراتی ڈل اس ہم مریک ۔ سرجم حوال آتا رداٹ شہزادہ محمد بن سلمان ہرا وزراء کونسل نا نائب صدر و وزیر دفاع تون اوار سلطنت نا کیہی اہم عہدہ غاتیا ٹی ءِ ، (اینو) آن بنا کروک آ تینا دورہ ٹی صدر مملکت ڈاکٹر عارف علوی تون اوڑدہی کیک۔ سعودی ولی عہد وزیراعظم عمران خان و چیف آف آرمی اسٹاف جنرل قمر جاوید تون ہم اوڑدہی کیک ۔ پاکستان نا سینیٹ نا اسہ ڈل اس ہم ولی عہد تون اوڑدہی کیک ہراٹی ہڑتوم آ ملک آتا نیام اٹ پارلیمانی کمکاری ءِ مون آ دننگ نا وڑوڈول آتیا گپ و تران مریک۔ سعودی ولی عہد تون اوار وزیر آک ہم تینا بشخ آتے ٹی ہڑتوم آ کنڈآتا کمکاری آ گپ و تران کن تینا پاکستانی ہم منصب آتون اوڑدہی کیک ۔ دورہ ٹی ہڑتوم آ ملک آتا کاروباری شخصیت آک نجی بشخ آتے ٹی اواری اٹ کاریم نا وارخواہی تیا گپ و تران کن اوڑدہی کیرہ۔ دورہ ٹی پاکستان و سعودی عرب زرکاری، خزانہ، بجلی ، قابل تجدید توانائی ، داخلی و سلامتی ، میڈیا ، دودوربیدگ و گوازی تتون اوار چندی بشخ آتا بابت کیہی معاہدہ و مفاہمت نا یات داشت آتیا دستخط ہم کیرہ ۔ ہڑتوم آ ملک آک کمکاری نا ٹھوس بشخ جاٹ آ دمدستی پیش رفت و گچین عملدرآمدءِ المی جوڑ کننگ کن سوگو پیروی نظام اس جوڑ کننگ نا وڑوڈول آتیا ہم ہیت وگپ کیرہ۔ سعودی ولی عہد محمد بن سلمان نا دورہ غان کمکاری نا غٹ بشخ جاٹ آتے ٹی ہڑتوم آ ملک آتا نیام اٹ تین پہ تینی تعلقداری تیٹی نمان ودکی گمانی ءِ۔ سرکاری ذرائع نا رداٹ وزیراعظم عمران خان تینٹ ایئر پورٹ آ سعودی ولی عہد ءِ بخیر کیک و اودے 21 توپ آتا سلامی تننگک، وزیراعظم تون اوڑدہی آن بیدس وزیراعظم ہاؤس اٹی اونا شرف اٹی اِرغ اس تننگک، داکان بیدس ایوان صدر اٹی ہم اونا شرف اٹی ہم اِرغ اس تننگک، ایلو شخصیت آتون ہم سعودی ولی عہد نا اوڑدہی مریک ۔
