اسلام آباد۔ 15 فروری (اے پی پی) بنجائی وزیر ڈٹ بندی شونداری و اصلاحات و شماریات ڈویژن مخدوم خسرو بختیار زور شاغانے کہ چین آن فارغ مروک آ پاکستانی گریجویٹس آتا ڈیٹا بیس ءِ برقرار تخنگے تانکہ چندی بشخ آتے کن کسب کار بندغ آتیا تالان پول اس دستیاب مرے، پول ءِ سی پیک فرم ورک انا رداٹ چندی بشخ آتا شونداری کن کاریم اٹ اتنگ مریک ۔ اوداہیت ءِ جمعہ نادے آ نسٹ انا شعبہ چائنیز سٹڈیز سینٹر آف ایکسیلنس نا ڈل اتون اوڑدہی ٹی پارے۔ اوڑدہی ٹی پروجیکٹ ڈائریکٹر سی پیک احسان داؤد و وزارت نا بڑزکو کمامدارآک ساڑی ئسر۔ بنجائی وزیر پارے کہ ساڑی حکومت چین نا حکومت تون اواری اٹ اقتصادی راہداری نا دنگ ءِ ودفسا کشت وکشار ، نیزگاری نا چٹفنگ، راجی و اقتصادی و تکنیکی چاہندار نا بشخ آتے اوار کرینے۔ اوپارے کہ فی الحال 25ہزار نا خڑک پاکستانی طالب علم چین اٹی تعلیم کننگ ءُ۔ اوپارے کہ تعلقدار بشخ آتے ٹی چین آن فارغ مروک آ طالب علم آک سی پیک نا شونداری و سرسہبی ٹی اہم کڑد ادا کننگ کیرہ۔ بنجائی وزیر پارے کہ حکومت نیزگاری نا چٹفنگ و الس نا معاشی و راجی شونداری کن کیہی پائلٹ ڈٹ آتا بناءِ کننگ ءِ و دا بشخ آتے ٹی چین آن فارغ مروک آ پاکستانی چاہندار آک اسہ اہم ءُ کڑد اس ادا کننگ کیرہ۔ دیوان اٹی دا پاننگاکہ سی پیک سینٹر آف ایکسیلنس ، پائیڈ و وزارت ڈٹ بندی ہائر ایجوکیشن کمیشن و نیو ٹیک نا کمکاری آن کسب کار بندغ آتا دوئی کننگ کن آن لائن جاب پورٹل جوڑ کننگ ءُ۔ بنجائی وزیر پارے کہ نسٹ انا چائنیز سٹڈیز سینٹر آف ایکسیلنس چائینہ غان فارغ مروک آ پاکستانی گریجویٹس آتے دا جاب پورٹل آ رجسٹر کننگ اٹ کمک فراوان کننگ کیک ہراڑان نوکری تا دوئی کننگ کن کمک رسینگک۔
