اسلام آباد۔ 15 فروری (اے پی پی) صدر مملکت ڈاکٹر عارف علوی پارت کرینے کہ سول ایوارڈز نا منظوری ٹی میرٹ آ سختی اٹ عمل کننگے، سائنس ، ٹیکنالوجی ، تعلیم و واپار نا بشخ آتے ٹی زیات ایوارڈ بایدے تروئی مرے۔ اوداہیت ءِ سیکرٹری کابینہ نا کنڈآن سول ایوارڈز آ تروک آ احوال اٹی پارے ہراٹی سول ایوارڈ تننگ نا کسوٹی و وڑودول نا بارواٹ پاننگا۔ جمعہ نادے آ ایوان صدر آن جاری بیان نا رداٹ صدر مملکت پارت کرے کہ ایوارڈز نا منظوری ٹی میرٹ آ سختی اٹ عمل کننگے و وایوارڈز نا درخواست آتا پورو و سرجم سکروٹنی کننگے۔ صدر مملکت پارے کہ ملک انا آخبت سائنس و ٹیکنالوجی تون گنڈوک ءِ ہنداخاطران سائنس و ٹیکنالوجی ، تعلیم و کاروبار نا بشخ آتے ٹی زیات ایوارڈ تننگے۔ صدر مملکت پارت کرے کہ ایوارڈز تننگ نا کسوٹی آ ہروخت نظر ثانی کننگے۔ صدر مملکت پارے کہ ہندن ءُ حکمت عملی اس جوڑ کننگے ہراڑان سول ایوارڈز نا قدر و قیمت اٹی ودکی مرے۔ اوپارے کہ دا یوارڈز ملک و قوم انا خذمت ءِ کروک آ شاری تا خذمت آتے امنا کننگ نا گچین ءُ ذریعہ اسے۔
