اسلام آباد ۔ 15 فروری (اے پی پی) صدر مملکت ڈاکٹر عارف علوی ءَ گوشت کہ پاکستان ءُُ چین مُدام وت مہ وتی کمک ءُُ شریکدار بوتگ اَنت، چین ءِ گوما یکوئی پاکستان ءِ درئی پالیشی ءِ ارزشتی ایں بھر اِت۔ آ چین ءِ پیپلز پولیٹیکل کنسلٹیٹیو کانفرنس ءِ وائس چیئرمین گاؤژن لونگ ءَ گوں گپ ءُُ تران کنگ ءَ ات۔ اے موہ ءِ سر ءَ سینیٹ ءِ سروکیں باسک سینیٹر شبلی فراز ءُُ پاکستان ءَ چین ءِ سفیر ژاؤجن ھم ساڑی ات۔ صدر مملکت ءَ گوشت کہ پاکستان سی پیک ءَ را ٹوھیں ارزشت ءِ دنت ءُُ ایشی ءَ را زوت سرجمی ءِ واستہ جزمیگ انت۔ آئی ءَ گوشت کہ سی پیک ءِ دومی بھر ءَ ما یا مئے دلگوشی چاگرد ءُُ اقتصادی دیمروئی، کشت ءُُ کشاری کمک، صنعتی کار رپک، کاروبار ءُُ تجارت، سائنس ءُُ ٹیکنالوجی ءُُ موسمی مٹ ءُُ بدلی ءِ وڑیں شوبگ آنی سر ءَ دلگوشی انت۔ آئی ءَ امیت سہرا کت کہ لستیں ھاسیں اقتصادی زونز آنی ھمے سال ءَ بنگیج کنگ بیت۔ صدر ءِ مملکت ءَ گوشت کہ سروکی ءِ تک ءَ دو نیمگی تر ءُُ تاب دوئیں ملک آنی نیام ءَ ھمروچگیں دوستی ءُُ جوانیں یکوئی ءِ چیدگ اِنت۔ آئی ءَ گوشت کہ مزن وزیر عمران خان ءِ گوستگیں سال ءَ چین ءِ تر ءُُ تاب سک باز کامیات بوتگ ایشی ءَ چہ مئے براتی گیش مھکم ءُُ تپاکی ءَ را ودوکی رستگ۔
