اسلام آباد۔ 15 فروری (اے پی پی) چیئرمین سینیٹ محمد صادق سنجرانی پارینے کہ پاکستان اٹی امن نا حالیت آک یکسر بدل مسنو وپاکستان اٹی زرکاری کن سازگار چاگڑد اس ساڑی ءِ، ہراڑان درملکی زرکارآک فائدہ ہرفنگ کیرہ۔ اوخاص وڑاٹ بلوچستان و گوادر نا ذکر ءِ کرسا پارے کہ بلوچستان اٹی زرکاری نا بھلو گنجائش اس ارے و گوادر ڈیہہ نا شونداری نا آخبت ءِ ۔ چیئرمین سینیٹ داخیال آتا درشانی ءِ برطانوی ہائی کمشنر تھامس ڈریو تون پارلیمنٹ ہاؤس اٹی اوڑدہی ٹی کرے۔ چیئرمین سینیٹ پارے کہ پاکستان و برطانیہ نا تعلقداری نا تینا اسہ تاریخ اسے، و ننا خواہش ءِ کہ دا تعلقداری تے پارلیمانی، سیاسی ، واپاری و معاشی کہول آ پین ودفنگے۔ چیئرمین سینیٹ پارے کہ ہراڑے پاکستان و برطانیہ نا نیام اٹ ایلو بشخ آتے ٹی مثالی کمک مسنے ہموڑے تعلیم نا بشخ اٹی رابطہ غاتے پین ودفنگ نا گرج ءِ و دا مسخت کن پاکستانی طالب علم آتے زیات آن زیات اسکالر شپ تننگے تانکہ ورناچین ءِ برطانیہ نا تعلیمی ادارہ غاتے ٹی بڑزکو تعلیم نا دوئی کننگ نا موقع ملے و پدی برسا ملک انا شونداری و شونہالی ٹی تینا کڑد ءِ ادا کیر۔ صادق سنجرانی ہڑتوم آ ملک آتا پارلیمانی ادارہ غاتا نیام اٹ اسہ ایلو نا آزموندہ غاتیان فائدہ ہرفنگ کن ادارہ جاتی کمکاری ءِ مون آ دننگ آ زور شاغا و پارے کہ کانود سازی، انتظامی امور، پٹ وپول ، لائبریری ، سروسز، تعلقات عامہ و ایلو بشخ آتے ٹی برطانیہ نا آزموندہ غاتیان پبی فائدہ ہرفنگ مریک۔ چیئرمین سینیٹ پارے کہ برطانیہ نا جمہوریت نا تینا اسہ تاریخ اسے و جمہوری قدر و روایت آتے پین مون آ دننگ کن برطانوی آزموندہ غاتیان فائدہ ہرفنگ مریک۔ برطانوی سفیر چیئرمین سینیٹ نا خیال آتیان امنا کرسا پارے کہ پاکستان اٹی امن و ایمنی نا حالیت آتے ٹی بھاز بھلو گچینی اس بسنے و ہندا سوب ءِ کہ برطانیہ نا صف اول نا ایئر لائن برٹش ایئر ویز پاکستان آن تینا جہاز آتے دُوارہ بناکننگ نا فیصلہ کرے۔ اوپارے کہ داعمل آن زرکار آتا پت ءِ بحال کننگ اٹ کمک رسینگک۔ چیئرمین سینیٹ برطانوی ہائی کمشنر ءِ گوادر نا دورہ ءِ کننگ نا ہم سلہ خلک۔ اوپارے کہ گوادر اٹی زرکاری کن بھلو گنجائش اس ارے و ہائی کمشنر تینٹ زرکاری کن ڈغاری راستکی تا جاچ ءِ ہلنگ کیک۔ برطانوی ہائی کمشنر پارے کہ برطانیہ و پاکستان اسہ ایلو کن المی ءُ۔ برطانیہ پاکستان اٹی سالانہ راجی بشخ انا شونداری ٹی ارب آ روپئی نا امداد تننگ ءِ وخت اس کہ تعلیم نا بشخ اٹی دولت مشترکہ اسکالرشپ اسکیم و چیونگ پروگرام نا رداٹ طالب علم آتے برطانیہ نا تعلیمی ادارہ غاتے ٹی تعلیم نا وارخواہی فراوان کننگ ءِ۔ برطانیہ نا سفیر ڈل آتا ہن و بر اٹی ترندی اتنگ آہم زور شاغا۔ اوپارے کہ برطانیہ ٹی داوخت آ 12پارلیمنٹ نا باسک پاکستانی نژاد ءُ۔ چیئرمین سینیٹ برطانوی دارالعلوم اٹی کشمیر نا ویل ءِ پبی وڑاٹ تالان کننگ کن برطانیہ نا حکومت ، سیاسی جماعت و الس نا منت واری ءِ ہرفے۔ اوپارے کہ سینیٹ نا خارجہ امور کمیٹی نا برطانیہ و خاص کر برطانوی دارالعلوم نا دورہ کشمیر نا ویل ءِ مثبت وڑاٹ تالان کننگ و بھارتی فوج انا کنڈآن کروک آ انسانی حق انا خلاف ورزی تا بابت باور کرفوئی ئس۔ چیئرمین سینیٹ پارے کہ کشمیر نا ویل و کشمیری تا حق خودارادیت کن تحریک نا پبی مخ تفی آ برطانیہ نا حزب اقتدار و حزب اختلاف نا منت وار اُن۔ چیئرمین سینیٹ دا وخت آ برطانیہ نا دارالامراء نا لارڈ اسپیکر ءِ پاکستان نا دورہ ءِ کننگ نا سلہ ہم خلک۔
