اسلام آباد ۔ 14 فروری (اے پی پی) اسپیکر قومی اسمبلی اسد قیصر پارینے کہ پاکستان آذربائیجان تون تینا تعلقداری تے بھاز اہمیت ایتک ہرا تاریخ دودوربیدگ و مذہب نا اسیجا قدر آتیا گنڈوک ءُ، پاکستان اقتصادی و پارلیمانی تعلقداری تے مون آ درسا ہڑتوم آ کنڈآتا تعلقداری تے پین سوگو کننگ نا خواہش مند ءِ۔ اوداخیال آتا درشانی ءِ پاکستان اٹی آذربائیجان نا سفیر علی علی زادہ تون گپ و تران کرسا کرے ہراپنچ شنبے نادے آ پارلیمنٹ ہاؤس اٹی اسپیکر تون اوڑدہی کرے۔ اسپیکر پارے کہ ہڑتوم آ ملک آتا چندی معاملہ و فورم تیا اسہ ایلو نا مخ تفی ءِ کننگ ، ہڑتوم آ ملک آتا نیام اٹ سوگو تعلقداری تا درشانی ءِ۔ اوپارے کہ ہڑتوم آ ملک آک چندی علاقائی و جہانی معاملہ غاتیا اسہ وڑنا موقف تخرہ۔ اوکشمیر ناویل آ آذربائیجان نا کنڈآن پاکستان نا موقف نا مخ تفی نا ستاءِ کرے۔ اوسفیر ءِ آذربائیجان نا پوریاگر برادری ءِ پاکستان اٹی چندی بشخ آتے ٹی تین پہ تینی کمکاری ناپوسکن ءُ کسر پٹنگ کن پاکستان نا دورہ ءِ کننگ آ آمادہ کننگ کن پارے۔ اسپیکر ہڑتوم آ برادر اسلامی ملک آتا کانود ساز ادارہ غاتا نیام اٹ خڑکی رابطہ غاتے مون آ دننگ نا گرج آ زور شاغا۔ اوپارے کہ ہڑتوم آ ملک آتا پارلیمنٹ نا باسک آک پاکستان و آذربائیجان نا نیام اٹ سنگتی و کمکاری ءِ مون آ دننگ اٹ ہم کڑد ادا کننگ کیرہ۔ اوسفیر ءِ پاکستان نا قومی اسمبلی ٹی پاکستان۔آذربائیجان فرینڈز شپ پڑک نا اول سرٹہیفنگ آن ہم معلومدار کرے۔ او آذربائیجان نا اسپیکر ءِ پاکستان نا دورہ ءِ کننگ نا سلہ ہم خلک۔
