اسلام آباد۔ 14 فروری (اے پی پی) وزیر مملکت موسمیاتی بدلی زرتاج گل پارینے کہ کاسمیٹکس نا گڑاتے جوڑ کروک آ کمپنیک زالکار ءِ رنگ ءِ پیہن کننگ نا لالچ ترسا جلدی مرض ودی کننگ ءُ، میک اپ جوڑ کروک آ 56کمپنی تا مصنوعات آتے ٹی بھلو کچ اسے ٹی پارہ ئس ہرا جلد اکن بے کچ خراب ءُ، الس ءِ آسراتی تننگ حکومت نااولیت ءِ، پاکستان ترندی اٹ بدل مننگ ءِ ہرا نا ستاءِ داسہ دنیا کننگ ءِ۔ داخیال آتا درشانی ءِ او پنچ شنبے نادے آ ’’نامیاتی کچٹی نا توننگ و سلاہ‘‘ نا سرحال آ ورکشاپ آن تران کرسا کرے۔ اوپارے کہ ننا وزارت ملک اٹی چاگڑدی نا گچینی کن ٹھوس گام گیج کننگ ءِ، ملکی تاریخ اٹی چاگڑدی نابابت اہم ءُ ڈٹ بناکننگانے ہراٹی کلین اینڈ گرین پاکستان نا رداٹ ملک انا کنڈ کنڈ اٹی شجرکاری کننگک۔ اوپارے کہ ورناک ننامیرات ءُ، چاگڑدی بدلی کن ننے اوفتا آئیڈیا غاتے کن جاست و پاست نا گرج ءِ۔ اوپارے کہ وزیراعظم عمران خان نا سرکڑدہ ہی ٹی ملک شونداری نا کسر آ روان مسنے و حالیت آک ترندی اٹ بدل مننگ ءُ ، داسہ دنیا ہم پاننگ ءِ کہ پاکستان درست سمت آ روان مسنے۔ اوپارے کہ عمران خان ملک آن وڈی خوری نا چٹفنگ نا عزم کرینے، کس اسے تون نئے ڈیل مریک و نئے کس اسے تون ڈھیل ایتنہ۔ اوپارے کہ الس ءِ آسراتی تننگ حکومت نا اولیت ءِ و حکومت السی ویل آتیان جوانی اٹ واقف ءِ۔ زرتاج گل پارے کہ وزارت نا کنڈآن کروک آ پٹ وپول نا رداٹ ہندی و ملٹی نیشنل 59 کمپنی تیان 56کمپنی تا مصنوعات آتے ٹی پارہ نا بھلو کچ اس مسنے ہرا انسانی جلد اکن بے کچ خراب ءُ۔ اوپارے کہ رنگ ءِ پیہن کننگ نا لالچ ترسا کاسمیٹکس کمپنیک زالکاراٹی جلدی مرض ودی کننگ ءُ۔ وزارت دا بابت کاریم کننگ ءِ و نن دا کمپنی تے نوٹس جاری کینہ۔ اوپارے کہ ننے تینا ملک اٹی آگاہی ودی کروئی مریک انتئے کہ زالبول رنگ ءِ پیہن کننگ نا غرض اٹ تینا جلد آ زیار خلنگ ءُ۔ اوپارے کہ پارہ نا کاسمیٹکس اٹی زیات کاریم اٹ اتنگ جلد انا بڑزکو تہہ ءِ نسخان ایتک ہراڑان کینسر کون آ مرض آک ودی مننگ ءُ۔
