اسلام آباد۔14 فروری (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ بیلٹ اینڈ روڈ ڈٹ دا صدی ءِ بدل کننگ ءِ ، سی پیک دا پلان نا اہم ءُ ڈٹ اسے، سی پیک غٹ سیاسی و علاقائی سوچ اتون گنڈوک ڈٹ اسے، دانا سوب پاکستان توانائی تنکی نا مون ءِ توننگ اٹ سرسہب مسنے۔ داخیال آتا درشانی ءِ او فرینڈز آ ف سلک روڈ دود آن تران کرسا کرے۔ بنجائی وزیر پارے کہ بجلی ڈٹ آتا سوب پاکستان اٹی زرکاری ممکن مننگ ءِ، 8 می سی پیک اسیجا کمکاری کمیٹی ٹی 2019 ء ءِ صنعتی سال گوندنگ نا فیصلہ کننگا، وزیراعظم پاکستان نا دورہ چین نا وخت آ کشاری کمکاری نا معاہدہ مس، ہندا دورہ ٹی راجی و معاشی بشخ ءِ شونداری تننگ و نیزگاری نا چٹفنگ کن معاہدہ کننگا۔اوپارے کہ سی پیک ءِ ودفسا اودے اسہ ہند ن ءُ راہداری اس جوڑ کننگ نا کوشست مننگ ءِ ہرانا کیہی درگہ غاک مریرہ، سی پیک بزنس فورم نا ٹہیفنگ ءِ عمل اٹ اتنگ انگ ءِ تانکہ بزنس کمیونٹی تون رابطہ غاتے مون آ دننگے۔ اوپارے کہ راجی بشخ اٹی چینی چاہندار آک ہندا تُو انا آخیر اٹی پاکستان نا دورہ ءِ کننگ ءُ تانکہ دا بشخ اٹی کمکاری ءِ مون آ دننگے، ساڑی حکومت سی پیک نا رداٹ صنعتی کمکاری آ پورو چکار کننگ ءِ ، بروک آ 6ہفتہ ٹی رشکئی اقتصادی زون نا بنداو ءِ تخنگک، سی پیک صنعتی کمکاری نا سوب واپاری نسخان نا مون ءِ توننگ اٹ کمک ملک، اوپارے کہ حکومت داڑے زرکاری اتنگ کن ہروڑگام گیج کننگ ءِ، چینی حکومت تینا کمپنی تا پاکستان آ گدریفنگ نا است بڈی ءِ کے، ساڑی حکومت گوادر نا شونداری ءِ اولیت آتے ٹی اوار کرینے، گوادر نا چندی ڈٹ بشمول پاور پلانٹ، گوادر ایئر پورٹ، ووکیشنل انسٹی ٹیوٹ و ہسپتال ڈٹ آتا بناءِ کننگک، گوادر سٹی ماسٹر پلان ءِ بروک آ 6 ہفتہ ٹی گڈیکو دروشم اس تننگک، سی پیک نا رداٹ کشت و کشار نا بشخ ءِ شونداری تننگ کن کاریم نا بنا ءِ کننگانے۔ اوپارے کہ کشت وکشار پاکستان نا جی ڈی پی نا اہمءُ بشخ اسے، دابشخ اٹی شونداری نا خاطر خواہ وارخواہی ارے، راجی بشخ اٹی چین نا کنڈآن اسہ بلین ڈالر گرانٹ تننگ آ چینی حکومت نا منت وار اُٹ۔ اپریل اٹی گمانی بیلٹ اینڈ روڈ فورم اٹی پاکستان پبی بشخ ہلیک، سی پیک ءِ پوسکن آ بڑزی تسکان دننگ کن پرعزم اُن۔
