کوئٹہ۔ 14 فروری (اے پی پی) ڈائریکٹر جنرل نیب بلوچستان محمد عابد جاوید قومی احتساب بیورو نا کیس آتے ٹی وڈی خوری ءِ امنا کروک آ آفیسر و سرکاری ملازم آتا برخلاف بلوچستان حکومت نا کنڈآن بیڈا ایکٹ 2011نا رداٹ کارروائی نا فیصلہ نا ستاءِ کرسا پارینے کہ دا فیصلہ ساڑی حکومت نا وڈی خور ی نا برخلاف عزم انا شاہدی اسے۔ اوواضح کرے کہ نیشنل اکاؤنٹیبلیٹی آرڈیننس 1999 نا کانود نا رداٹ پلی بارگین کروک آ بندغ نئے بیرہ نوکری آن برخاست کننگک بلکن او 10 سال اسکان ہر سرکاری عہدہ و گچین کاری کننگ کن ہم نابود گوندنگک۔ ولے نیب کیس آتے ٹی چندی ہندن ءُ دوبہ دار ہرافتیا وڈی خوری نا دوبہ غاک ءُ او داسکان کلیدی عہدہ غاتیا تولوک ءُ۔ قومی احتساب بیورو بلوچستان حکومت نا دا ویل انا کنڈا مستین اٹی وار اوار چکار ءِ کرفے ولے دُن انگا آفیسر آتا برخلاف ہچ ءُ عملی گام گیج اس چست کننگتو۔ مالی وڈی خوری نا مرتکب سرکاری ملازم آتا برخلاف بیڈا ایکٹ 2011 نا رداٹ کارروائی است بڈءِ۔ کلیدی عہدہ غاتیان وڈی خور آفیسر آتے اینک کننگ نا عملی گام گیج آن وڈی خوری نا حوصلہ شکنی و اہل آفیسرآتا تعیناتی آن دیانتدارآفیسر آتا است بڈی مریک۔ صوبائی حکومت نا دافیصلہ وڈی خوری نا چٹفنگ کن جوان ءُ گام گیج اسے۔ ہراڑان نئے بیرہ حکومتی کارکڑدگی ٹی گچینی بریک بلکن دا شونداری نا ہدف آتا دوئی کننگ اٹ ہم کمکار جوڑ مریک۔ ڈائریکٹر جنرل نیب بلوچستان محمد عابد جاوید وڈی خوری نا پورو چٹفنگ نا گرج آ زور شاغسا پارینے کہ قومی احتساب بیورو چیئرمین نیب جسٹس جاوید اقبال نا وژن ءِ مون آ تخسا وڈی خوری ءِ ماس کش کننگ کن غٹ وسیلہ غاتے کاریم اٹ اتنگ ءِ۔ اوپارے کہ بلوچستان معدنی وسیلہ غاتیان ہمپوک ءُ صوبہ اسے۔ اگہ داوسیلہ غاتے ایمانداری و دیانتداری اٹ کاریم اٹ اتنگے تو ہر بندغ شونہال ءُ زند اس گدریفنگ کیک۔ داوڈی خوری نا ناچوڑ ءِ ہرا ہر بندغ ءِ شونداری عمل نا بھرم تیان محروم کرینے۔
