سی پیک ڈیہہ نا شونداری کن ننا اسیجا وژن نا مثال ءِ، پاکستان و چین نا نیام اٹ بین الپارلیمانی رابطہ و ڈل آتا ہن و بر ءِ پین مون آ دننگ نا گرج ءِ
اسلام آباد۔ 14 فروری (اے پی پی) سینیٹ اٹی قائد ایوان سینیٹر سید شبلی فراز پارینے کہ ڈیہہ نا شونداری ننا اسیجا وژن ءِ و سی پیک دانا اسہ مثال اسے، وزیراعظم عمران خان شونداری و شونہالی نا وژن ءِ ہلسا مون آ ہِننگ ءِ ، بین الپارلیمانی رابطہ و ڈل آتا ہن و بر ءِ پین مون آ دننگ نا گرج ءِ۔ داخیال آتا درشانی ءِ او پنچ شنبے نادے آ چین نا السی سیاسی سلابتی کانفرنس نا نائب چیئرمین گاوین لانگ تون اوڑدہی ٹی کرے۔ اوپارے کہ ڈیہہ نا شونداری ننا اسیجا وژن ءِ، سی پیک دانا مثال اسے۔ وزیراعظم عمران خان شونداری و شونہالی نا وژن ءِ ہلسا مون آ ہِننگ ءِ ۔ سینیٹر شبلی فراز پارے کہ پاکستان و چین نا نیام اٹ ہر کہول آ گچین تعلقداری ساڑی ءِ ، چین اتون برادرانہ تعلقداری ننا خارجہ پالیسی نا اہم ءُ بشخ اسے ، بین الپارلیمانی و ڈل آتا ہن وبر ءِ پین مون آ دننگ نا گرج ءِ۔ اوپارے کہ چین اتون سفارتی تعلقداریک مدام مثالی مسنو۔ پاکستان اسہ چین نا پالیسی نا مخ تفی ءِ برجاتخک۔ اوپارے کہ پاک چین پارلیمانی سنگتی پڑک آتے گچین کننگ بے کچ اہم ءِ۔ چین نا چندی بشخ آتے ٹی زرکاری ءِ بخیر اٹ پانہ۔ سینیٹر شبلی فراز پارے کہ واپار، زرکاری ، سیل و سوات نا بشخ آتے ٹی بھلو گنجائش اس ارے۔
