اسلام آباد۔13فروری (اے پی پی)پاکستانءَ چینءِ سفیر یاؤجنگ ءَ منصوبہ بندی ءِ بنجاہی وزیر مخدوم خسروبختیار ءَ گوں چارشمبے ءِ روچءَ گندءُ نندکتگ۔ گندءُ نندءَ دونیمگی ہاس پاک چین اقتصادی راہداری ءِ سرءَ جاڑی بوتگیں کارانی سرءَ گپ ءُ تران بوتگ۔ سیکرٹری پلاننگ ظفر حسن ءُ پراجیکٹ ڈائریکٹر سی پیک حسان داؤد ہم گندءُ نند ءَ ہوار بوتگ۔ بنجاہی وزیر مخدوم خسرو بختیار ءَ گشتگ کہ گوادر منصوبہ گوادر بالی پڑ، نادراہ جاہ، ووکیشنل انسٹی ٹیوٹ ءُ پاورپلانٹ ءِ سرءَ کار بوہگءَ اِنت، اے منصوبہ پہ زرکاری کنگءَ جوانیں موہ دنت ءُ ہندی آباتی ءَ زند ءِ بنکی آسراتی ءَ دیئگءَ کمک کنت۔ بنجاہی وزیر ءَ اے موہءَ پاک چین کشتءُ کشاری کمک ءِ ارزشت ءِ سرءَ زور پِرداتگءُ گشتگ کہ بنجاہی حکومت صوبہ آنی گوما ہوار جوائنٹ ورکنگ گروپ ءِ دیوانءَ چہ پیسر روڈ میپ جوڑ کنگ ءَ اِنت۔ آئیءَ گشتگ کہ ما کشتءُ کشاری ءِ پڑءَ ٹیکنالوجی ، چینی مارکیٹ ءَ سربوہگ، سائنسی ءُ تکنیکی کمک ءِ واہشت مند اَنت۔ گند ءُ نندءَ دوئیں رھشوناں اپریل ءِ ماہءَ بیلٹ اینڈ روڈ فورم ءِ موہءَ پاکستانءِ مز ن وزیرءِ چینءِ ترءُ تابءِ چن ءُ لانچ کنگءِ سرءَ تپاک کتگ۔
