شونداری و شونہالی نا سفر اٹی سعودی حکومت نا شرکت ءِ الس قدر انا نظر اٹ ہرک
اسلام آباد۔ 13 فروری (اے پی پی) بنجائی وزیر پٹرولیم غلام سرور خان پارینے کہ سعودی عرب نا ولی عہد محمد بن سلمان نا بننگ پاکستان اٹی بہار انا پڑو ءِ، شونداری و شونہالی نا سفر اٹی سعودی حکومت نا شرکت ءِ الس قدر انا نظر اٹ ہرک۔ تینا اسہ بیان اسے ٹی او پارے کہ سعودی عرب نا ولی عہد محمد بن سلمان نا دورہ پاکستان آن وطن عزیز اٹی تاریخ ساز معاہدہ و ریکارڈ زرکاری مننگ نا گمانی ءِ۔ اوپارے کہ والہانہ مذہبی لگاؤ نا سوب آن پاکستان نا است سعودی عرب تون اوار دھڑکک، ہندا سوب ءِ کہ پاکستان نا الس سعودی شاہی خاہوت کن بے پناہ عقیدت نا جوزہ تخرہ و لی عہد محمد بن سلمان نا پاکستان آ بننگ نا چاری ءُ۔ غلام سرور خان پارے کہ دہائی تیا محیط پاکستان و سعودی عرب نا تعلقداریک سوگو آن سوگو مرسا ہِننگ ءُ، حکومت پاکستان سفارتی محاذ آ برادر اسلامی ملک انا ہم کوپہ سلوک ءِ۔ اوپارے کہ حکومت سعودی عرب نا پاکستان اٹی زرکاری نا خیرمقدم ءِ کیک۔ سعودی ولی عہد محمد بن سلمان نا دورہ پاکستان نا دورس بھرم دوئی مریک۔ غلام سرور خان پارے کہ پاکستان و سعودی عرب نا تعلقداری سوگو بنداو تیا گنڈوک ءُ وخت اس کہ سعودی ولی عہد نا دورہ پاکستان آن دا ہڑتوم آ کنڈآتا تعلقداری تے ٹی وسعت بریک۔ اوپارے کہ سعودی حکومت نا پاکستان اٹی تاریخ ساز زرکاری حکومت وخت انا دا خواست انا بھرم ءِ ہراٹی نن سعودی حکمران تے پاکستان اٹی زرکاری نا سلہ خلکوسن تانکہ پاکستانی معیشت ءِ پیشن نا زرکاری نا مد اٹی سوگوی تننگ مرے ہرانا بھرم تے الس اسکان سرکننگ مرے۔ یات سلے کہ پاکستان تحریک انصاف نا دور اٹی گمانی تاریخ ساز زرکاری ءِ السی حلقہ غاتے ٹی بے پناہ مقبولیت دوئی ءِ ہرا سعودی حکومت نا کنڈآن پاکستان اٹی داوخت اسکان کروک آ غٹ آن بھلا زرکاری مریک ہرانا رداٹ گوادر اٹی ارب آ ڈالر نا خڑچ آن بھلو ریفائنری سے نا ٹہیفنگ ہم اوار ءِ۔
