اسلام آباد۔ 13 فروری (اے پی پی) سعودی عرب نا ولی عہد شہزادہ محمد بن سلمان وزیراعظم نا سلہ غا 16فروری آن پاکستان نا اِرادے ئی دورہ ءِ کیک۔ شہزادہ محمد بن سلمان وزراء کونسل نا نائب صدر و وزیر دفاع تون اوار سلطنت نا کیہی اہم عہدہ غاتیا فائز ءِ۔ اوڑتون اوار سعودی شاہی خاہوت نا باسک آک، کلیدی وزیر آک و پنی آ واپاری شخصیت آتون اوار بڑزکو اختیاراتی ڈل ہم مریک۔ ترجمان دفتر خارجہ نا کنڈآن چارشنبے نادے آ جاری بیان نا رداٹ اپریل 2017 ء ٹی ولی عہد نا منصب آ فائز مننگ آن پد دا شہزادہ محمد بن سلمان نا پاکستان نا ریاستی کہول آ اولیکو دورہ مریک۔ 16 و 17 فروری آ تینا دورہ ٹی او صدر مملکت تون اوڑدہی کیک۔ سعودی ولی عہد وزیراعظم عمران خان و چیف آف آرمی اسٹاف جنرل قمر جاوید باجوہ تون ہم اوڑدہی کیک۔ پاکستان نا سینیٹ نا اسہ ڈل اس ہم ولی عہد تون اوڑدہی کیک ہراٹی ہڑتوم آ ملک آتا نیام اٹ پارلیمانی کمکاری ءِ مون آ دننگ نا وڑوڈول آتیا گپ و تران مریک۔ سعودی ولی عہد تون اوار وزیر آک ہم تینا بشخ آتے ٹی ہڑتوم آ کنڈآتا کمکاری آ گپ و تران کن تینا پاکستانی ہم منصب آتون اوڑدہی کیرہ۔ دورہ ٹی ہڑتوم آ ملک آتا واپاری شخصیت آک نجی بشخ اٹی اواری اٹ کاریم نا وارخواہی تیا گپ و تران کن اوڑدہی کیرہ۔ دورہ ٹی پاکستان و سعودی عرب زرکاری، خزانہ، بجلی، قابل تجدید توانائی، داخلی سلامتی، میڈیا، دودوربیدگ و گوازی تتون اوار چندی بشخ آتا بابت کیہی معاہدہ و مفاہمت نا یات داشت آتیا دستخط ہم کیرہ۔ ہڑتوم آ ملک آک کمکاری نا ٹھوس بشخ آتیا دمدستی پیش رفت و عملدرآمد ءِ المی جوڑ کننگ کن سوگو پیروی نظام اس جوڑ کننگ نا وڑوڈول آتیا ہم گپ و تران کیرہ۔ بیان اٹی پاننگانے کہ سعودی ولی عہد محمد بن سلمان نا دورہ غان کمکاری نا غٹ بشخ آتے ٹی ہڑتوم آ ملک آتا نیام اٹ تین پہ تینی تعلقداری تے ٹی نمان ودکی نا گمان ءِ۔
