اسلام آباد۔ 13فروری (اے پی پی) اسپیکر قومی اسمبلی اسد قیصر تون پاکستان اٹی قطر انا سفیر مبارک المنصوری چارشنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی ہڑتوم آ کنڈآتا تعلقداری و تین پہ تینی است خواہی نا معاملہ غاتیا گپ و تران کننگا۔ داوخت آ گپ و تران کرسا اسپیکر قومی اسمبلی پارے کہ مسلم امہ ءِ مون تروک چیلنج آتا مقابلہ ءِ کننگ کن ننے تین پہ تین سیوت نا گرج ءِ، پاکستان قطر اتون تینا دیرینہ برادرانہ تعلقداری تے بھاز اہمیت ایتک۔ اوپارے کہ پاکستان پارلیمانی سفارتکاری و اقتصادی کمکاری ٹی مون آ دننگ نا کمک اٹ ہڑتوم آ کنڈآتا تعلقداری تے پین ودفنگ خواہک ، پارلیمانی سفارت کاری ہڑتوم آ ملک آتے خڑک اتنگ اٹ اہم کڑد ادا کننگ کیک، پاکستان نا پارلیمان ہڑتوم آ ملک آتا نیام اٹ برادرانہ تعلقداری تے پین سوگو کننگ کن پرعزم ءِ۔ اوپارے کہ ساڑی حکومت ملک اٹی زرکار دوست پالیسی جوڑ کننگ ءِ ہرافتیان قطر انا زرکار آک فائدہ ہرفنگ کیرہ۔ پاکستان اٹی توانائی، گیس و تیل انا بشخ آتے ٹی زرکاری نا بھلو وارخواہی اس ارے ہرافتے ٹی قطری کمپنیک زرکاری کننگ کیرہ، پاکستان اٹی کسب کار افرادی واک ساڑی ارے ہرا قطر انا جوڑ جاڑ و شونداری ٹی اہم کڑد ادا کننگ کیرہ، ہڑتوم آ ملک آتا نیام اٹ مروک آ واپاری کچ اٹی ودکی نا گرج ءِ۔ داوخت آ قطری سفیر مبارک المنصوری پارے کہ قطر پاکستان تون تینا تاریخی دوستانہ تعلقداری تے بھاز قدر انا نظر اٹ ہرک ، قطر پاکستان تون اقتصادی و معاشی کمکاری ءِ پین مون آ دننگ نا خواہش مند ءِ۔ اوپارے کہ قطر اٹی رہینگوک آ پاکستانی پردیسیک قطر انا جوڑ جاڑ و شونداری ٹی اہم ءُ کڑد ادا کننگ ءُ۔ قطری کمپنیک پاکستان اٹی زرکاری ٹی بھاز است خواہی تخرہ۔ اوپارے کہ مسلم ملک آتے ٹی ہم گرنچی ءِ مون آ دننگ و اوفتا نیام اٹ بے چیٹی تا چٹفنگ کن پاکستان نا کوشست آک ستاکڑزرہ۔ قطری سفیر اسپیکر قومی اسمبلی اسد قیصر ءِ 6اپریل آ قطر اٹی مروک آ بین الاپارلیمانی یونین نا دیوان اٹی بشخ ہلنگ کن سلہ نامہ اس ہم تس۔
