حکومت ملک اٹی کٹیا کروک کاروباری ڈٹ آتا بناءِ کننگ کن زرکار آتے آسراتی تننگ کن پرعزم ءِ
اسلام آباد۔ 13 فروری (اے پی پی) وزیراعظم عمران خان پارینے کہ حکومت ملک اٹی کٹیا کروک کاروباری ڈٹ آتا بناءِ کننگ کن زرکارآتے آسراتی تننگ کن پرعزم ءِ، و واپار اٹی آسانی ودی کننگ آ چکار کرینے۔ اوداہیت ءِ ینگ پریذیڈنٹ آرگنائزیشن و گرگن پڑک نا سی او پاسکل گرکن تون گپ و تران کرسا پارے ہرا چارشنبے نادے آ وزیراعظم آفس اٹی اوڑدہی کرے۔ سلاہکار واپار عبدالرزاق داؤد، چیئرمین زرکاری بورڈ ہارون شریف ئسک ہم داوخت آ ساڑی ئسر وخت اس کہ ڈل اٹی ایم ڈی ابیکس کنسلٹنگ عباس علی خان، سی ای او اے نا مارکیٹنگ عابد عمر ، ایم ڈی سوات سرائمیکس کمپنی اظہر ناصر، سی ای او انٹر ووڈ موبل پرائیویٹ لمیٹڈ عمر فاروق ، سی ای او ہاشو گروپ مرتضیٰ ہاشوانی و چیئرمین ایم فائیو گروپ منیر معشوق اللہ اوار ئسر۔ پاسکل گرکن وزیر اعظمءِ ینگ پریذیڈنٹ آرگنائزیشن نا مچ آ دنیا ٹی تالان مروک آ نیٹ ورک انا بارواٹ معلومدار کرے ہرا معیشت نا چندی بشخ آتے ٹی خذمت انجام تننگ ءِ۔ اودرملکی سیل و سوات و زرکار آتے کن حکومت نا آزادانہ پالیسی تا ستاءِ کرے۔ وزیراعظم چیئرمین ینگ پریذیڈنٹ آرگنائزیشن نا پاکستان اٹی خیرمقدم ءِ کرسا معیشت نا چندی بشخ خاص کر سیل و سوات نا پڑاٹی وارخواہی تے تالان کرے۔ وزیراعظم پارے کہ سیل و سوات نا بشخ اٹی زرکاری کن بے کچ و بھلو وارخواہی اس ارے ہرافتیان داوخت اسکان فائدہ ہرفنگتنے۔ اوپارے کہ حکومت واپار اٹی آسانی ودی کننگ آ چکار کننگ ءِ و داٹی بے کچ آسان ویزہ پالیسی اس درستی راستی کرفینے ہرانا مسخت واپار و سیل و سوات ءِ مون آ دننگ نا ءِ۔ یات سلے کہ ینگ پریذینٹس آرگنائزیشن نوجوان چیف ایگزیکٹو ز نا جہانی نیٹ ورک ءِ ہرانا باسک آتا کچ ہزار آتے ٹی ءِ و گرکن پڑک براعظم ایشیا و یورپ و ریاست ہائے متحدہ امریکہ نا 11 کمپنی تیا تالان کاربن و گریفائٹ ٹیکنالوجی نا انجینئرنگ کمپنی ءِ ہرانا ہیڈ کوارٹر بیلجیئم نا دارالحکومت برسلز اٹی ءِ۔ پاسکل گرکن گریگر ایس اے پنی ءُ ریئل اسٹیٹ پڑک اسے نا شریک بانی ہم ارے۔ دا پڑک نا بزنس جرمنی و بیلجیئم اٹی ءِ۔ او سیل و سواتی جاگہ غاتا جوڑ کروک آ کمپنی اوشن فرنٹ میانمار نا بانی ہم ارے۔ او ینگ پریذیڈنٹس آرگنائزیشن نا بورڈ انا ڈائریکٹر ہم ارے۔
