ورلڈ گورنمنٹ سمٹ دبئی ٹی موبائل ایپلی کیشن تا مقابلہ ٹی پاکستان سٹیزن پورٹل دنیا ٹی ارٹ میکو گچین انگا موبائل ایپ قرار،
انڈونیشیا اولیکو، امریکہ مسٹ میکو پوزیشن ءِ ہلک
اسلام آباد۔ 13 فروری (اے پی پی) وزیراعظم عمران خان شاری تا ویل و غاو تا دمدستی ایسر ی کن وزیراعظم آفس اٹی فعال پاکستان سٹیزن پورٹل نا شاندار سرسہبی آ است جمی نا درشانی ءِ کرینے۔ چارشنبے نادے آ تینا ٹویٹ اٹی وزیراعظم پارے کہ ویل آتا ایسری کن الس تون براہ راست رابطہ نا بست و بند وزیراعظم آفس اٹی جوڑ کروک ’’میرے شکایات سیل‘‘ نا زبردست سرسہبی نا کسر ءِ آوار کرینے۔ یات سلے کہ ورلڈ گورنمنٹ سمٹ دبئی ٹی ساڑی آ موبائل ایپلیکیشنز نا مقابلہ ٹی پاکستان سٹیزن پورٹل ءِ دنیا ٹی ارٹ میکو گچین انگا گورنمنٹ موبائل ایپ نا درجہ تننگانے۔ انڈونیشیا اولیکو وخت اس کہ امریکہ مسٹ میکو پوزیشن ءِ ہلک۔ مقابلہ ٹی 87 ملک آتیان چندی کیٹیگری تا 4646ایپلیکیشن آتے پیش کننگا۔ سٹیزن پورٹل الس آن 5آن 4.5 نا درجہ بندی دوئی کرے و گوگل سرچ کیٹیگری ٹی 7می نمبر آ ئس۔ دُن اولیکو وار مسنے کہ پاکستان اٹی اسہ سرکاری ءُ موبائل ایپلیکیشن اس دا مرتبہ ءِ دوئی کرینے ۔ دا ایپلیکیشن صوبہ خیبر پختونخوا نا اسہ ٹیم اس بیدس معاوضہ غان ڈیزائن و تیار کرے۔ دادے 45دے انا ریکارڈ مداٹی تیار کرسا تدوک آ سال 28 اکتوبر آ بناکننگا۔ دا پورٹل نا کمک اٹ الس نا کنڈآن 55 درسد نا است جم کچ اتون داوخت اسکان 4لکھ 20 ہزار آن 2لکھ 50 ہزار غاو تے ایسر کننگا۔
