اسلام آباد۔ 13 فروری (اے پی پی) بنجائی وزیر بین الصوبائی رابطہ ڈاکٹر فہمیدہ مرزا پارینے کہ وزیراعظم ملک اٹی گوازی تا پڑ ءِ آباد ہُننگ خواہک ۔ داخیال آتا درشانی ءِ او تدوک آ دے جناح اسٹیڈیم اٹی پنجاب پڑک آف کالجز نا سالانہ اسپورٹس گالا نا بنائی دود آن تران کرسا کرے۔ اوپارے کہ ملک اٹی گوازی تا پڑءِ آباد کننگ وزیراعظم نا اولیت آتے ٹی اوار ءِ۔ اوپارے کہ پاکستان نا آجوئی آن جمہوریت نا بحالی اسکان زالکار نا اہم ءُ کڑد اس مسنے۔ اوپارے کہ کنے شرف دوئی ءِ کہ پاکستان نا اولیکو زالبول اسپیکر ئسٹ و اولیکو زالبول اسپیکر نا وڑاٹ مچ آ ملک انا زالبول آتا نمائندگی ءِ کریٹ ۔ اوپارے کہ پاکستان ننکن اسہ عظیم ءُ نعمت اسے اونا قدر ءِ کین و ہر ادارہ ءِ وڈی خوری آن پاک کروئی ءِ۔ ورلڈ کپ یا اولمپکس اٹی ہراتم پاکستان نا بیرک بڑ ز مس تو کاٹم فخر اٹ بڑزامریک۔ اوپارے کہ وزیراعظم نا ویژن نا رداٹ کلین و گرین پاکستان نا رداٹ ملک ءِ ساف تخن۔ زیات آن زیات نیال خلین ، گوازی تے ٹی زیات آن زیات بشخ ہلین۔ اوپارے کہ صوبہ غاتیان ہم اومیت کینہ کہ گوازی تے مون آ دیر وہاؤسنگ سوسائٹی ٹی گوازی تا پڑمف تو موکل تفس۔ مارچ اٹی زالبول کن اسپیشل ءُ دے اس اڈ ایتنہ۔ اوپارے کہ پاکستان اسپورٹس بورڈ ءِ زالبول ءِ وارخواہی تننگ نا پارت کرینن۔ اسکول کالج آتے ٹی اسپورٹس کن کلاسز تخر۔ بنجائی وزیر مسن تا جوزہ غاتا ستاءِ کرسا پارے کہ پاکستان نا مسنک دنیا ٹی ہچ کس آن کم افس و اوفتے بیرہ وارخواہی تننگ نا گرج ءِ۔ اومستی پارے کہ وزیراعظم ہم اسہ گوازی گر اسے و او خواہک کہ نناچناک ننا گوازی تا پڑءِ آباد کیر۔ مچ آ پاکستان اٹی گوازی تے مون آ دروئی ءِ۔ ایسری آ بنجائی وزیر پنجاب گروپ آف کالجز ءِ سپورٹس گالا نا سرسہب اڈتننگ آ مبارکبادی تس۔
