پاکستان ریلوے نا حالیت ءِ گچین کننگ کن اینخو نا سال 20 مال بردار ٹرین چلیفنگ نا ہدف ءِ
راولپنڈی۔ 13 فروری (اے پی پی) بنجائی وزیر ریلوے شیخ رشید احمد پارینے کہ پاکستان ریلوے نا حالیت ءِ گچین کننگ کن اینخو نا سال 20 مال بردار ریل چلیفنگ نا ہدف ءِ، قوم اتون کروک آ وعدہ غاتار داٹ ٹرین تا جال اس تالان کینہ، چل بندغ آتا لین اس لگوک ءِ او غٹ جیل آ کارہ، داڑیل آک ملک ءِ لٹ وپل کرسا ہنانو، ریلوے ءِ ہم بے دردی اٹ پلنگا، آئی ایم ایف بیوسی ءِ، ایم ہم وزیراعظم مسوٹہ تو آئی ایم ایف آ ہناٹہ، سعودی ولی عہد نا دورہ پاکستان تاریخی اہمیت نا حامل مریک، داخیال آتا درشانیءِ بنجائی وزیر ریلوے شیخ رشید احمد چارشنبے نا سہب اتون راولپنڈی ریلوے اسٹیشن آن ملتان کن ’’تھل ایکسپریس ‘‘ نا روانگی آن مست میڈیا تون گپ و تران کرسا کرے۔ اوپارے کہ تھل ایکسپریس ملتان آن کراچی اسکان ہم کاہک، دا ٹرین ءِ مزور آک جوڑ کرینو اوفتا منت واری ءِ ہرفیوہ۔ بنجائی وزیر پارے کہ ریلوے پولیس نا تنخواہ تیٹی ہم ودکی کننگک، مزور آتے اسہ اسکیل اس تروئی ءِ، کراچی آن پشاور اسکان ڈبل ٹریک نا فیصلہ مریک و لئی ایکسپریس وے ءِ ہم جوڑ کینہ۔ اوپارے کہ ٹرین نما و ای ہم نما اُٹ، عمران خان ءِ خبر الوکہ کہ ہرابے دردی اٹ ملک ءِ لٹ وپل کننگا۔ ملک انا خاطر عمران خان سعودی ولی عہد و یو اے ای نا سروک تون ذاتی تعلق اس جوڑ کرینے۔ اوپارے کہ تھل ایکسپریس نا جاری کننگ آ ریلوے نا مزور و آفیسر آتے سلام پیش کیوہ ، وزیراعظم تون ہیت کرینٹ کہ مزور آتے اسہ اسکیل اس تروئی ءِ و ریلوے پولیس نا تنخواہ تے پنجاب پولیس نا بریبر کروئی ءِ، ریلوے ٹی بھرتی تا عمل ءِ 8 آن 10 دے اٹی پورو کننگک، پاکستان ریلوے نا بحالی کن ٹھوس گام گیج کننگ اُن، ہراڑے کہ پٹڑی ارے ہموتسکان ٹرین ءِ دینہ، اینخو نا سال ملک انا کنڈ کنڈ آ کانہ، کناخواہش ءِ ایم ایل ون جوڑ مرے، ہندا تُو کراچی آن پشاور اسکان ڈبل ٹریک نا فیصلہ مرے و لئی ایکسپریس وے جوڑ مرے، 14سال آن تعطل نا گواچی طالب علم آتا کالج نا کاریم ءِ ہم ہندا تُو اٹی بناکینہ، غریب آباد اٹی ہم کالج نا بناءِ کینہ، ’’آرام ہم پر حرام ہے‘‘ نا نعرہ ءِ خلکونن، وزیراعظم سعودی عرب و متحدہ عرب امارات تون جوان ءُ تعلقداری گنڈانے، داڑان تاریخی زرکاری بریک، 3ٹرین 1350 روپئی ٹی پشاور آن کراچی آ ہلسا دننگ ءِ ، ہرانا نشست آتا کچ 160و 140 ءِ، دا ٹرین تے ٹی جناح ایکسپریس امراء کن و سرسید ایکسپریس صاحب ثروت خلقت کن بروک آ تُو بناکننگ اُن، الس ءِ ریلیف تننگ کن ہروڑنا کوشست کننگ اُن۔ صحافی تا سوج آتا ورندی ءِ ترسا اوپارے کہ 40 بندغ آتا لین لگوک ءِ داغٹ دُز و داڑیل آک تہہ ٹی مریرہ۔ داوخت آ ڈویژنل سپرنٹنڈنٹ راولپنڈی ریلوے منور شاہ، ڈویژنل کمرشل آفیسر حامد فاروق قریشی تون اوار ایلو آفیسر آک ہم ساڑی ئسر۔ داوخت آ شاری تا بھلو کچ اس ہم ریلوے اسٹیشن آ ساڑی ئس۔ ڈویژنل سپرنٹنڈنٹ راولپنڈی ریلوے منور شاہ اے پی پی تون گپ و تران کرسا پارے کہ تھل ایکسپریس راولپنڈی آن ملتان براستہ کندیاں رادہ مس۔ تھل ایکسپریس راولپنڈی ریلوے اسٹیشن آن ہردے سہب انا 7 بجہ غا رادہ مریک و 11گھنٹہ ٹی ملتان آ سرمریک۔ تھل ایکسپریس 9 اسٹیشن بشمول راولپنڈی، ترنول، جنڈ، میانوالی، کندیاں ، بھکر ، لیہ ، کوٹ ادو، مظفر گڑھ آن مرسا ملتان آ سرمریک۔ اے پی پی ءِ دوئی معلومداری تار داٹ ’’تھل ایکسپریس ‘‘ نا راولپنڈی آن ملتان اسکان اے سی نا کرایہ 1280 روپئی وخت اس کہ اکانومی کلاس نا کرایہ 670 روپئی تخنگانے۔ تھل ایکسپریس اٹی جم نشست آتا کچ 712 ءِ وخت اس کہ دافتے ٹی 7اکانومی کوچ، اسہ ایئر کنڈیشنڈ، اسہ کارگو و اسہ پاور پلانٹ کوچ اسے تون اوار 10 کوچ اوار ءُ۔ مسافرآک پاکستان ریلوے نا کنڈآن راولپنڈی آن ملتان ’’تھل ایکسپریس ‘‘ نا بناءِ ستاکڑزوک گوندانو و پارینو کہ داڑان ملتان و ایب وکیب اتون اوار ایلو شار تا مسافر آتے آسراتی دوبریک۔ مسافر آک راولپنڈی آن ملتان کن ٹرین نا جاری کننگ آ بنجائی وزیر ریلوے شیخ رشید احمد نا ہم منت واری ءِ ہرفیر۔
