کوئٹہ۔ 13 فروری (اے پی پی) نیب بلوچستان گورنمنٹ فنڈ اٹی 4کروڑ 46لکھ انا نغڑد، ڈی جی نیب بلوچستان نا کنڈآن وارنٹ دزگیری جاری کننگ آ مسکوہی ایکسین پی ایچ ای ءِ دزگیر کریر۔ ترجمان نیب بلوچستان نا پریس ریلیز نا رداٹ چارشنبے نادے آ نیب بلوچستان گورنمنٹ فنڈ اٹی 4کروڑ 46لکھ انا نغڑد، ڈی جی نیب بلوچستان نا کنڈآن وارنٹ دزگیری جاری کننگ آ مسکوہی ایکسین پی ایچ ای ءِ دزگیر کریر۔ مسکوہی ایکسین محکمہ پی ایچ ای غلام سرور بگٹی و ایلو فک سرکار نا قومی خزانہءِ کروڑ آ روپئی تا نسخان تسر۔ قومی احتساب بیورو بلوچستان نا تعلقدار کیس اٹی بناکروک آ جاست وپاست نا رداٹ سال 2017 ء ٹی مسکوہی ایکسین الیکٹریکل اینڈ ڈویژن محکمہ پی ایچ ای ایلو ملازم آتون اواری اٹ گورنمنٹ فنڈ ءِ نغڑدسا 4کروڑ 46لکھ روپئی ءِ جیب تا نذر کریر، ڈائریکٹر نیب بلوچستان محمد عابد جاوید دوبہ دار تا برخلاف جاست وپاستی ٹیم نا کنڈآن ناقابل تردید شاہدی تے مون آ تخسا و مستی جاست وپاست کن دوبہ دار غلام سرور بگٹی نا وارنٹ دزگیری ءِ جاری کرے ہراڑا نیب انا انٹیلی جنس ٹیم دوبہ دار ءِ کوئٹہ غان دزگیر کرینو۔ دوبہ دار ءِ احتساب عدالت اٹ پیش کرسا جونی ریمانڈ دوئی کننگک، ڈائریکٹر جنرل نیب بلوچستان وڈی خوری نا برخلاف بے سگ انا پالیسی نا عزم انا اعادہ ءِ کرسا پارینے کہ قومی وسیلہ غاتے لٹ وپل کروک آ وڈی خور عنصر آتے ہرحال اٹ سزا ترفنگک۔ وڈی خوری نا برخلاف بے سگ انا پالیسی نا چرجوئی برجاسلک، اوپارے کہ بلوچستان نا وسیلہ غاک الس نا امانت ءُ دافتے ٹی خیانت کروک آتے کانود نا رداٹ سزا تننگک۔
