کوئٹہ۔ 12 فروری (اے پی پی) وزیراعلیٰ بلوچستان جام کمال خان پارینے کہ آن لائن خراج ہلنگ نا نظام بلوچستان اٹی خراج سسٹم نا گچینی نا کنڈا اہم ءُ پیش رفت اسے، شونداری نا عمل مالی سوگوی تون وابستہ ءِ، بلوچستان اٹی گدرینگوک آ پانزدہ بیست سال انا انتظامی بے وڑی تا نتیجہ اینو ویل آتا مش اس جوڑ مرسا مون آ بسنے، بلوچستان اٹی پینشن بل 23 ارب روپئی ءِ ہرا بروک آ پنچ سال اٹی 200 ارب روپئی مریک، بلوچستان اٹی گورننس نا گچین ءُ پنجر اسے نا گرج ءِ، بلوچستان نا سالانہ کٹیا پانزدہ ارب روپئی ءِ، بروک آ منہ سال اٹی دا ہدف آتے چِل ارب روپئی اسکان دننگ خوانہ، داخیال آتا درشانی ءِ او سے شنبے نادے آ محکمہ ایکسائز نا آن لائن خراج کلیکشن سسٹم نا بناءِ کننگ نا وخت آ تران کرساپارے۔ دود اٹی صوبائی سلاہکار ایکسائز ملک نعیم خان بازئی، صوبائی وزیر ٹرانسپورٹ محمد عمرخان جمالی، صوبائی وزیر لیبر سرفراز چاکر ڈومکی ، صوبائی سلاہکار گوازی و دودوربیدگ عبدالخالق ہزارہ ، صوبائی سلاہکار تعلیم محمد خان لہڑی ، صوبائی سلاہکار لائیو اسٹاک مٹھاخان کاکڑ، ڈی جی ایکسائز سہیل الرحمان بلوچ تون اوار ایلو بڑزکو آفیسر آک ہم دا دود اٹی ساڑی ئسر ، دود آن تران اٹی وزیراعلیٰ بلوچستان جام کمال خان پارے کہ ادارہ غاتیٹی جوانی نا بھاز گنجائش ساڑی ءِ ، ہشت کابینہ دیوان آتے ٹی موثر کانود سازی و گام گیج سلاہ کننگانے صوبائی سلاہکار ایکسائز ملک نعیم خان بازئی دود آن تران کرسا پارے کہ محکمہ ایکسائز بلوچستان اینخو مالی سال اِرا ارب ہشت کروڑ ہشتاد لکھ روپئی خراج ہلنگ نا ہدف ءِ مقرر کرینے، محکمہ ءِ مون تروک ویل آتے ایسر کرسا شرح ریونیو ٹی ودکی ممکن ءِ۔ محکمہ ایکسائز بلوچستان صوبائی و بنجائی حکومت آتے کن شش وڑنا خراج ہلیک۔ گاڈی تا رجسٹریشن کن نادرا تون لنک اس جوڑ کننگانے۔ 7 سیکورٹی فیچر آتیا مبنی سمارٹ کارڈ اس درستی راستی کرفنگانے ہرا رجسٹریشن بک انا جاگہ ءِ ہلیک۔ حکومت نا مالی پوزیشن اخس کہ جوان مریک جم اٹنگا شونداری ہموخس ہی گچین مریک ، اواری اٹ ہندن ءُ نظام اس اتنگ خوانہ ہرا بروک آ چین تا رکھوک آخبت نا ضمانت مرے، بلوچستان اٹی آن لائن خراج ہلنگ نا نظام اس درستی راستی کرفنگانے اوپارے کہ بلوچستان اولیکو صوبہ مریک، ہراڑے ہفتہ نا ہفت انگا دے بیست ءُ چار گھنٹہ خراج جمع کرفنگ مریک، پاکستان نا ہرجاگہ غان گاڈی تا ویری فیکشن ءِ کننگ مریک ، اوپارے کہ بلوچستان آن رجسٹرڈ گاڈی تا غٹ ڈیٹا ءِ مرکزی ڈیٹا سینٹر اٹی فیلڈ کننگانے۔ محکمہ گاڈی تا ہلنگ و بہاکننگ نا عمل اٹ کڑدہ غاتا شناختی عمل ءِ پک کننگ کن نادرا و محکمہ ایکسائز بلوچستان نا نیام اٹ ایم او یو آ دستخط کننگانے۔
