اسلامی فوجی اتحاد دہشت گردی نا برخلاف اسہ سوگو ءُ پلیٹ فارم اسے، پاکستان ڈیہہ نا شونداری و شونہالی کن ویل آتا پرامن ایسری اس خواہک
اسلام آباد۔ 12 فروری (اے پی پی) چیئرمین سینیٹ محمد صادق سنجرانی پارینے کہ اسلامی فوجی اتحاد دہشت گردی نا برخلاف اسہ سوگو ءُ پلیٹ فارم اسے، دا سیوت خاص ءُ ریاست یا قوم اسے نا برخلاف اف بلکن دہشت گردی نا برخلاف جاری کوشست آتے پین منظم جوڑ کننگ کن ءِ، پاکستان ڈیہہ نا شونداری و شونہالی کن ویل آتا پرامن ایسری اس خواہک۔ داخیال آتا درشانی ءِ او سے شنبے نادے آ دہشت گردی نا برخلاف اسلامی فوجی اتحاد نا کمانڈر ان چیف جنرل (ر) راحیل شریف تون پارلیمنٹ ہاؤس اٹی اوڑدہی ٹی کرے۔ اوڑدہی ٹی اہم جہانی معاملہ غاتیا گپ و تران مس و داوخت آ سینیٹ نا باسک آک و اسلامی فوجی اتحاد نا ڈل انا باسک آک ہم ساڑی ئسر۔ داوخت آ چیئرمین سینیٹ پارے کہ اسلامی فوجی اتحاد دہشت گردی نا برخلاف اسہ سوگو ءُ پلیٹ فارم اسے، پاکستان دہشت گردی ٹی بھاز نسخان ہرفینے ولے پاکستانی فوج، الس و ایلو ادارہ غاک اواری اٹ دہشت گردی نا برخلاف جنگ کریر و سرسہبی دوئی کریر۔ اوپارے کہ پاکستان اسُل خواپک کہ پین ملک اس داوڑنا حالیت آتا گواچی مرے، دا سیوت خاص ءُ ریاست یا قوم اسے برخلاف اف بلکن دہشت گردی نا برخلاف جاری کوشست آتے پین منظم جوڑ کننگ کن ءِ۔ اوپارے کہ دہشت گردی نا برخلاف اسلامی فوجی اتحاد آن مسلم ملک آتیان بیدس ایلو ملک آک ہم فائدہ ہرفنگ کیرہ۔ دا اتحاد نا جوڑ کننگ آدنیا غان دہشت گردی ناچٹفنگ اٹ کمک رسینگک، ننکن خوشی نا سوب ءِ کہ دا فوجی اتحاد نا کماشیءِ پاکستان نا ریٹائرڈ جنرل راحیل شریف کننگ ءِ۔ چیئرمین سینیٹ پارے کہ پاکستان ڈیہہ نا شونداری و شونہالی کن ویل آتا پرامن ایسری اس خواہک، امن شونداری نا ضمانت ءِ ، مذاکرات ویل آتا ایسری ءِ۔ صادق سنجرانی پارے کہ دیرپا امن ڈیہہ غان غریبی و معاشی نزوری ءِ چٹفنگ اٹ کمکار جوڑ مریک۔ اوڑدہی ٹی جنرل (ر) راحیل شریف پارے کہ اسلامی فوجی اتحاد نا ٹہیفنگ آن دہشت گردی نا برخلاف جہانی کوشست آتے سوگوی ملانے، پاکستان مدام دہشت گردی نا برخلاف فعال کڑد ادا کرسا کرینے۔ اوپارے کہ اسلامی فوجی اتحاد نئے بیرہ ڈیہہ بلکن مچ آ دنیا ٹی دہشت گردی نا چٹفنگ و امن کن جاری کوشست آتے مربوط کیک۔
