اسلام آباد۔ 12 فروری (اے پی پی) وزیر خارجہ شاہ محمود قریشی تون مسکوہی آرمی چیف و اسلامی فوجی اتحاد نا کمانڈر ان چیف جنرل (ر) راحیل شریف سے شنبے نادے آ داڑے وزارت خارجہ ٹی اوڑدہی کرے۔ گپ و تران اٹی علاقائی امن و سوگوی تون اوار تین پہ تینی است خواہی نا معاملہ غاتیا گپ و تران کننگا۔ جنرل (ر) راحیل شریف وزیر خارجہ ءِ دہشت گردی نا برخلاف اسلامی فوجی اتحاد نا گام گیج آتیان معلومدار کرے۔ وزیر خارجہ علاقائی امن و سلامتی کن اسلامی فوجی اتحاد نا کوشست آتا ستاءِ کرے۔ یات سلے کہ دا اسلامی فوجی اتحاد 15 دسمبر 2015ء آ جوڑ مس ہراٹی بنائی وڑاٹ 34ملک اوار ئسر۔ اوکان پد اوفتا کچ 41اسکان سرمس۔ اسلامی فوجی اتحاد نا اولیکو کمانڈر پاکستانی فوج انا مسکوہی سروک ریٹائرڈ جنرل (ر) راحیل شریف ءِ جوڑ کننگا و داسہ ہم او اسلامی ملک آتا فوجی اتحاد نا کماشی نا فرض ءِ انجام تننگ ءِ۔ اسلامی فوجی اتحاد نا جوڑ کننگ نا مسخت اسلامی ملک آتیان دہشت گردی نا چٹفنگ کن کوشست کننگ نا ءِ۔
