کوئٹہ۔ 19جنوری (اے پی پی) حکومت بلوچستان نا ترجمان انوارالحق کاکڑ بلوچستان یونین آف جرنلسٹ نا پوسکن گچین مروک آ صدر خلیل احمد، جنرل سیکرٹری ایوب ترین، جوائنٹ سیکرٹری نذرمحمد بلوچ، فنانس سیکرٹری رشید بلوچ تون اوار غٹ پوسکن گچین مروک آ عہدیدار آتے مبارکباد پیش کرسا پارے کہ بلوچستان حکومت آجوئی اظہار آ پورو یخین تخک و میڈیا راج انا چارمیکو تمبہ ئِ ہرا راج انا ویل آتے تالان کننگ تون شونداری ڈٹ و حکومتی کارکڑد آن ہم الس ئِ آگاہ کیک وخت اس کہ ذرائع ابلاغ نا کمک اٹ بروک آ سلاہ غاک شاری تا ویل آتے ایسر کننگ اٹی اہم کڑد ادا کیرہ۔ اوپارے کہ صحافت اسہ مقدسئُ پیشہ اسے و داڑتون وابستہ بندغ آک شرف نا قابل ئُ۔ میڈیا راج ئِ درست سمت انا کنڈآروان کننگ و رائے عامہ ئِ بدلیفنگ اٹی اہم کڑدادا کیک۔ پنچ شنبے آ تینا تہنیتی کلہو اٹی ترجمان حکومت بلوچستان انوارالحق کاکڑ اومیت ظاہر کرے کہ بلوچستان یونین آف جرنلسٹ نا پوسکن گچین مروک آ کابینہ وزیراعلیٰ بلوچستان نواب ثناءاللہ خان زہری نا سروکی ٹی صوبائی حکومت نا کنڈآن السی شرحالی کن جاری گام گیج آتے مثبت وڑاٹ تالان کننگ و صحافی برادری نا شرحالی کن کاریم کیرہ ۔ ترجمان حکومت بلوچستان بی یو جے نا پوسکن گچین مروک آ عہدیدار آتے کن نیک است خواہی نا درشانی ئِ کرسا اومیت ظاہر کرے کہ پوسکن آ سروک آک نئے بیرہ صحافی تا حق انا رکھ اکن کوشست کیرہ بلکن ملک و قوم و صوبہ نا جوانی و گچینی کن تینا متحرک و فعال کڑد ئِ ادا کیرہ۔