اسلام آباد۔ 18 جنوری (اے پی پی) پاکستان واضح کرینے کہ اوغانستان اٹی امن پاکستان نا فائدہ ٹی ءِ۔ حکومت نا اولیت آتا دا بشخ اسے، ننے خوشی ءِ کہ ننا داموقف کہ اوغانستان اٹی جھیڑہ نا ہچ ءُ فوجی ایسر اس اف، ءِ ایلو ملک آک ہم امنا کرینو۔ جمعہ نادے آ قومی اسمبلی ٹی اسہ سوج اسے نا ورندی ٹی وزارت خارجہ نا کنڈآن ایوان ءِ پاننگانے کہ پاکستان نا راجی اقتصادی شونداری کن اوغانستان اٹی امن المی ءِ۔ پاکستان و خاص کر وزیراعظم بھلو وخت اسے آن داپارسا کرینے کہ اوغانستان جھیڑہ نا ہچ ءُ فوجی ایسری اس اف۔ اوغانی تیا مبنی اوغان سرکڑدہ ہی ٹی امن و مفاہمت نا عمل ہی بیرہ دا معاملہ نا ایسری ءِ۔ ننے خوشی ءِ کہ ایلو ایلو خلقت ہم دانتیجہ غا سرمسنو۔ اوغانستان اٹی سیاسی ایسر اس پٹنگ کن پاکستان و امریکہ نا خیال آتے ٹی مطابقت ودی مسنے۔ صدر ٹرمپ دہشت گردی نا برخلاف پاکستان نا کڑد ءِ امنا کرینے و اوغان ویل انا ہیت و گپ انا کمک اٹ ایسر ی کن پاکستان نا کمک ءِ خواہسونے۔ پاکستان اوغان امن عمل ءِ سپورٹ کننگ کن غٹ اہم علاقائی ملک آتون رابطہ کننگ ءِ۔ سعودی عرب، متحدہ عرب امارات تون ننا رابطہ امن و مصالحتی عمل اس تننگ اٹ امنائی ودی کننگ اٹ کمک جوڑ مسنے۔ پاکستان اوغانستان نا مخ تفی کن ملک اٹی امن اس اتنگ کن تینا کوشست آتے ٹی ہمسایہ و علاقائی ملک آتون تینا رابطہ غاتے برجاتخک۔
