اسلام آباد۔ 09 جنوری (اے پی پی) پاک بحریہ نا سروک ایڈ مرل ظفر محمود عباسی پارینے کہ پاک بحریہ نا کوسٹل کمانڈ سرکریک آن جیونی اسکان تالان مروک آ کرکی پٹی، سی پیک و گوادر بندرگاہ نا بحری سیکورٹی کن ہردم تیار و مستعد ءِ ، کوسٹل کمانڈ بے کچ اہم ءُ آپریشنل کمانڈ اسے ہرا چنکو وخت اسے ٹی تینا کارکڑد و خواری اٹ نمان ہند اس دوئی کرینے۔ او چارشنبے نادے آ پاکستان نیوی کوسٹل کمانڈ نا سالانہ ایفیشنسی کمپیٹیشن پریڈ 2018 ء آن تران کریکہ۔ چیف آف دی نیول اسٹاف ایڈمرل ظفر محمود عباسی دود انا مہمان خاص ئس۔ نیول چیف کوسٹل کمانڈ نا 2018 ء ٹی آپریشنل سرجز آتا است جمی نا درشانی ءِ کرے۔ پاک بحریہ نا سروک ایڈمرل ظفر محمود عباسی پارے کہ پاکستان نیوی تینا پبی کسبی لائخی تے کاریم اٹ اتسا دشمن نا ہر بیدادی ءِ بے سہب جوڑ کننگ نا پورو لائخی تخک ، بروک آ دے تیٹی سمندری تنصیب آتا رکھ و سی پیک نا رداٹ کوسٹل کمانڈ نا زمواری تے ٹی ودکی مریک۔ اوپارے کہ پاک بحریہ سمندری معیشت نا بابت قومی آگہی مہم ءِ ترند کننگ نا بیڑا ءِ ہرفینے، دارداٹ میری ٹائم سیکورٹی ورکشاپ و سیمینار نا اڈتننگ قابل ذکر ءِ۔ اوپارے کہ ملکی معیشت اٹی میری ٹائم سیکٹر آن پبی فائدہ ہرفنگ کن کمرشل شپ یارڈز انا جوڑ کننگ و میری ٹائم ٹورزم آ چکار کننگ انگ ءِ ، بحری معیشت ءِ مون آ دننگ کن چندی چیمبرز آف کامرس نا دورہ غاتا است بڈ نتیجہ دوئی مننگ ءِ۔ اوپارے کہ کوسٹل کمانڈ ، ملکی کرکی پٹی ٹی گچین سول ملٹری تعلقداری، طبی آسراتی تا فراوانی و تعلیمی ادارہ غاتا جوڑ کننگ اٹ ہمہ وخت کوشست کننگ ءِ۔ نیول چیف سال 2018 ء ٹی نمان کارکڑد نشان تروک آ یونٹ آتے انعام تس ۔ داکان مست کمانڈ ر کوسٹ وائس ایڈمرل فیاض جیلانی سال 2018 ء ٹی کوسٹل کمانڈ یونٹس نا کارکڑدگی نا جاچ ءِ پیش کرے۔
