نیب ءِ گدرینگوک آ سال اٹی 44,315 غاو ملا، 1713 نا جانچ پڑتال نا فیصلہ ءِ کننگا، 877 ءِ انکوائری، 227 ءِ انویسٹی گیشن اٹی بدل کننگا، 503دوبہ دار ءِ دزگیر، پلوک آ 2580 ملین روپئی ءِ ہلسا قومی خزانہ ٹی جمع کرفنگا
اسلام آباد۔ 27نومبر (اے پی پی) قومی احتساب بیورو(نیب) ءِ گدرینگوک آ سال اٹی مچ آ ملک آن وڈی خوری نا 44ہزار 315 غاو ملا، اسہ ہزار 713 غاو تا شاہدی نا بناء آ جانچ پڑتال نا فیصلہ ءِ کننگا، 877 ءِ انکوائری و 227 ءِ انویسٹی گیشن اٹی بدل کننگا، 503دوبہ دارءِ دزگیر کننگا، وڈی خور عنصر آتیان پلوک آ 2580 ملین روپئی ءِ ہلسا قومی خزانہ ٹی جمع کرفنگانے۔ نیب انا اسہ سال انا کارکڑد رپورٹ نا رداٹ قومی احتساب بیورو (نیب ) انا چیئرمین جسٹس (ر) جاوید اقبال نا سرکڑدہ ہی ٹی وڈی خوری نا چٹفنگ کن ’’احتساب غٹ اکن‘‘ نا انسداد وڈی خوری نا موثر حکمت عملی آ عمل کننگ ءِ ہرانا سوب نیب اینو فعال و قابل پت ادارہ اس جوڑ مسنے۔ پلڈاٹ مشال پاکستان ٹرانسپرنسی انٹرنیشنل و جہانی اقتصادی فورم کون آ معتبر قومی و جہانی ادارہ غاک نیب انا کارکڑد نا ستاءِ کرینو۔ نیب شاری تا وڈی خوری نا بابت غاو تے بِننگ کن تینا درگہ ءِ ملانے۔ نیب ءِ وڈی خوری نا بابت 44ہزار 315 غاو ملانے ہرافتا غاو تا جاچ کمیٹی سرجم جاچ ءِ ہلکونے، دافتیان اسہ ہزار 713 غاوتا شاہدی نا بناء آ جانچ پڑتال نا فیصلہ ءِ کننگانے۔ 877 ءِ انکوائری و 227 ءِ انویسٹی گیشن اٹی بدل کننگانے۔ نیب اسہ سال اٹی نئے بیرہ503دوبہ دار ءِ دزگیر کرے بلکن وڈی خور عنصر آتیان پلوک آ 2580 ملین روپئی ءِ ہلسا قومی خزانہ ٹی جمع کرفینے، ہراکہ نمان سرسہبی اسے۔ نیب انا کنڈان ہلوک آ پیسہ غاتے سد آزہمی و گڑاس سرکاری ادارہ غاتے پدی تننگانے ولے دافتیان اسہ ٹکا اس ہم نیب آفیسر آتے تننگتنے، انتئے کہ نیب آفیسر آک وڈی خوری نا چٹفنگ ءِ تینا قومی فرض سمجھسا ادا کننگ ءُ ۔ داوخت اٹی نیب انا ایگزیکٹو بورڈ انا چندی دیوان مسنے ہرافتے ٹی کیہی اہم فیصلہ کننگانے ۔ نیب اسہ سال اٹی وڈی خوری نا 440 ریفرنس کیہی احتساب عدالت آتے ٹی دائر کرینے۔ داوخت ملک انا کیہی احتساب عدالت آتے ٹی 1209 وڈی خوری نا ریفرنس آتا سماعت برجاءِ۔ اینو نیب سارک ملک آتے کن رول ماڈل نا حیثیت تخک۔ نیب پاکستان نا اسٹ انگا ادارہ ءِ ہراٹی سزا نا شرح بے مٹ ءِ۔ چیئرمین نیب جسٹس (ر) جاوید اقبال نا انسداد وڈی خوری نا موثر حکمت عملی نا سوب آن داسرسہبی دوئی مسنے ہراڑا بے پرخ عمل کننگ انگ ءِ۔ نیب اسٹ انگا ادارہ ءِ ہراورناتے وڈی خوری نا خراب انگا زہم تیان آگاہ کننگ کن مچ آ ملک انا کالج و یونیورسٹی تے ٹی کڑد سازی نا 50ہزار آن زیات انجمن قائم کرینے۔ نیب انا موثر گام گیج آتا سوب آن مچ آ قوم وڈی خوری نا برخلاف ہم توار ءُ۔ نیب پاکستان ءِ کرپشن فری جوڑ کننگ و قوم انا است خواہی تیا پورو سلنگ کن تینا وڑوڈول اٹی گچینی ایسونے۔ نیب آفیسر آک ریاست نا ملازم ءُ و وڈی خور عنصر آتے کانود نا رداٹ ٹھوس شاہدی نا بناآ کانود نار داٹ اوفتے اوفتا کروک نا سزا تننگ کن پرعزم ءِ۔
