پاکستان کشمیری تے تنیا ہلیپک ، بھارتی ظلم انا برخلاف کشمیری تا مخ تفی ٹی ہرفورم آ ہیت کینہ
اسلام آباد۔ 25اکتوبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ قوم ءِ عملی وڑاٹ بدلی زوت نظر بریک، پاکستان کشمیری تے تنیا ہلیپک ، بھارتی ظلم انا برخلاف کشمیری تا مخ تفی ٹی ہرفورم آہیت کینہ۔ او تدوک آدے جناح اسٹیڈیم اٹی آزاد حکومت ریاست جموں و کشمیر نا 71می یوم تاسیس اٹی کشمیر جرنلسٹس فورم نا کنڈآن انٹرمیڈیا فٹ بال ٹورنامنٹ نا فائنل اٹی بطور مہمان خاص تران کریکہ۔ داوخت آ پیپلزپارٹی آزاد کشمیر نا سیکرٹری راجہ فیصل ممتاز راٹھور ، حریت راہشون عبدالحمید لون و فورم نا صدر عابد خورشید و شہزاد راٹھور ئسک ہم تران کریر۔ داوخت آ وزیر امور کشمیر گوازی گرآتے ٹی انعام ہم بشخ وپانٹ کرے و نغد انعام ہم تس۔ اوتینا تران اٹی پارے کہ ساڑی آحکومت اقوام متحدہ نا جنرل اسمبلی ٹی کشمیر نا ویل ءِ پبی وڑاٹ چست کرینے، بھارتی ظلم انا برخلاف ہرکہول آ ہیت کرسا کینہ۔ اوپارے کہ پاکستان ءِ داوخت آ مالی و اقتصادی تنکی نا مون تروکی ءِ ولے دا ویل آتا زوت مون ءِ تورنہ و بدلی زوت عملی وڑاٹ نظر بننگ نا بناءِ کیک۔ اوپارے کہ بھارت مقبوضہ کشمیر اٹی است ہسون ظلم کننگ نا باوجود کشمیری تا جہد آجوئی ءِ توننگ کتنے۔ اقوام متحدہ نا انسانی حق انا ادارہ نا کنڈآن مقبوضہ کشمیر اٹی بھارت نا کنڈآن انسانی حق انا خلاف ورزی تیا رپورٹ اس شینک کرسا اونا اصل دروشم ءِ دنیا نا مون آ پاش کرینے۔ اوپارے کہ پاکستان کشمیر نا ویل انا ایسری کن کوشست ءِ برجاتخک و کشمیری تا آجوئی نا جہد نا سیاسی، سفارتی و اخلاقی مخ تفی آن دزکش مفک۔ اوپارے کہ کشمیری اخبار آتے مون تروک ویل آتے ایسر کینہ۔ کشمیری صحافیک کشمیر نا ویل ءِ تالان کننگ کن پین گچین کڑد ادا کیر۔
