صدر مملکت ءَ پشاور ءِ اسکول ءِ حادثہ ءَ گران بہائیں جانی بیرانی ءِ سرا غم ءِ درشانی کتگ، ٹپیگاں جوانیں علاج ءِ آسراتی ءِ پجارینگ ءِ پنت ءُ شون کتگ، آماچیں ھانداناں ہر وڑیں کمک ءِ پجارینگ ءِ پنت ءُ شون

اسلام آباد۔15اکتوبر  (اے پی پی): صدر آصف علی زرداری ءَ پشاور ءَ بوتگیں غمناکیں اسکول ءِ وئیل ءَ زھگ ءُ استاد آنی بیرانی ءُ ٹپیگ آنی سر ءَ سک باز ھیران ءُ رنج ءُ گم ءِ درشانی کنان ءَ سیادی داروکیں واکدار آناں پنت ءُ شون کتگ کہ آ ٹپیگ آناں جوانیں درمان ءِ آسراتی بہ دنت ءُ آماچیں ھاندان آناں ھرچ وڑیں کمک بہ کن اَنت۔ پنچ شمبے ءِ روچ ءَ ایوان ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت آصف علی زرداری ءَ گوشت کہ اے دل ءِ ٹُکّوکیں وئیل ءَ سرجمیں راج ھبکہ کتگ۔ اے غم ءِ ساھت ءَ سرجمیں راج یک پیم ءَ آماچیں ھاندانانی غم ءَ بھر کنت۔ صدر ءِ مملکت ءَ بیران بوتگیں مردم ءُ پشکیں کھول ءِ گوما دلپدردی ءِ درشانی کتگ ءُ دعا کتگ کہ اللہ تعالیٰ بیران بوتگیں مردم ءَ را بھشت ءَ بُرزیں جاگہ ​​بہ دنت ءُ غم ءِ آماچیں کھول ءِ مردم آناں اے ناقابل تلافی تاوان ءِ برداشت کنگ ءِ ھمت ءُ صبر بہ دنت۔ صدر ءِ  مملکت ءَ حادثہ ءِ  تہ ءَ ٹپیگیں مردمانی زوت ءُ سرجمی ءَ جان سلامتی ءِ  دعا ھم کتگ۔ صدر ءِ مملکت ءَ سیادی داروکیں واکدار آناں پنت ءُ شون کت کہ آ ٹپیگ آناں جوانیں درمان ءِ آسراتی پجاری بہ کن اَنت ءُ آماچیں ھاندان آناں ھمک رنگ ءِ کمک بہ کن اَنت۔ صدر ءَ اے گپ ءِ سر ءَ ھم زور پر دات کہ حادثہ ءِ سبب آنی پجارینگ ءُ آیوکیں وھد ءَ اے وڑیں غمناکیں وئیل آنی دیم ءَ دارگ ءِ واستہ وانگ ءُ زانگ ءِ ادارگ آنی ماڑی آنی ایمنی ءِ ضلورت ءِ سر ءَ یک سرجمیں پٹ ءُ پول ءِ ضلورت اِنت۔