اسلام آباد۔ 25اکتوبر (اے پی پی) پاکستان تحریک انصاف نا پارلیمنٹ نا باسک آک پارینو کہ پاکستان نا تاریخ اٹی اولیکو وار حکومت وڈی خوری نا چٹفنگ کن پیدوار ءُ پام اسے تون مون آ ہِننگ ءِ ، وزیراعظم مصلحت آتیان ایڑتر مرسا بے پرخ احتساب آ یخین تخک ، سعودی عرب آن مالی پیکج نا مطلب دااف کہ این آر او اس مریک، وزیراعظم عمران خان ملک آن وڈی خوری نا چٹفنگ نا مشن ءِ مستقل مزاجی اٹ پورو کیک، ادارہ غاتیان وڈی خوری نا چٹفنگ و اوفتے سوگو جوڑ کننگ وزیراعظم عمران خان نا وژن ءِ ، نیب گچین وڑاٹ وڈی خوری نا چٹفنگ کن گام گیج کننگ ءِ ہرانا سوب پاکستان اٹی وڈی خوری نا کچ اٹی پدریسہ کمتی بننگ ءِ ۔ داخیال آتا درشانی ءِ او پنچ شنبے نادے ’’اے پی پی‘‘ تون خصوصی ہیت وگپ کرسا کریر۔ پارلیمانی سیکرٹری ہاؤسنگ اینڈ ورکس تاشفین صفدر پارے کہ وزیراعظم عمران خان وڈی خوری نا چٹفنگ کن مستقل مزاجی اٹ کاریم کننگ ءِ او خواہک کہ ادارہ غاتیان وڈی خوری نا چٹفنگ، میرٹ و شفافیت ءِ مون آ دننگے ہراڑآن ادارہ غاک سوگو مریرہ۔ اوپارے کہ وزیراعظم عمران خان ملک انا وام تے تننگ نا پام تخک۔ او آئی ایم ایف آ ہِننگ آن پاناد کننگ ءِ ، نن سعودی عرب آن شاندار ءُ مالی پیکج اس ہلکونن۔ اوپارے کہ مسکوہی حکومت آتے پاروئی مریک کہ اوفک ہرا بھلو کڑز اس ہلکر اوفتے ہراڑے خڑچ کریر۔ اوپارے کہ نن شفافیت اٹ السی مفاد نا ڈٹ آتیا پیسہ غاتے خڑچ کینہ انتئے کہ عمران خان نا کارکڑد نا بابت مچ آ دنیا چاہک نن ملکی معیشت ءِ سوگو کننگ کن پرعزم اُن۔ اوپارے کہ نیب سیاسی نیام تمنگ آن بیدس آزادانہ وڑاٹ کاریم کننگ ءِ۔ نیب بے پرخ احتساب نا پالیسی آ عمل کننگ ءِ ۔ نیب چہرہ و عہدہ ءِ ہُننگ آن بیدس مقدمہ غاتے پورو کننگ ءِ ہراکہ است جم ءِ۔ جہانی اقتصادی فورم نا ساڑی آ رپورٹ اٹی پاکستان نا درجہ بندی ٹی گچینی نیب انا شاندار کارکڑد گی نا عکاس ءِ۔ پارلیمانی سیکرٹری ڈٹ بندی شونداری واصلاحات کنول شوزب پارے کہ وزیراعظم عمران خان نا وڈی خوری نا چٹفنگ کن موقف ءِ و او مصلحت آتیان ایڑتر مرسا بے پرخ احتساب آ یخین تخک۔ اوپارے کہ اپوزیشن سیاست نا پن آ ڈرامہ بازی کننگ ءِ او خلقت ءِ گمراہ کننگ نا واویلا کننگ ءِ۔ ولے وزیراعظم عمران خان دُن انگا مفاہمت و پام ءِ منیپک او الس نا پیسہ غاتے پلوک آتے ہلیپک۔ پاکستان تحریک انصاف نا باسک قومی اسمبلی عندلیب عباس پارے کہ سعودی عرب آن مالی معاہدہ نا مطلب دااف کہ این آر او اس مریک۔ اوپارے کہ ساڑی آحکومت گڈگورنس و وڈی خوری آ چکار کرینے۔ پاکستان نا تاریخ اٹی اولیکو وار وڈی خوری نا چٹفنگ کن حکومت صفا ءُ سوچ اسے اتون مون آ ہِننگ ءِ۔ اوپارے کہ گدرینگوک آ اِراسال اٹ نیب وعدلیہ فعال وڑاٹ کاریم کننگ ءُ۔ وڈی خوری نا توننگ نا بابت چاروکی نا قومی و جہانی ادارہ غاتے ٹی پاکستان اٹی وڈی خوری ٹی کمتی نا اعتراف ءِ کرینو۔ جہانی اقتصادی فورم نا ساڑی آ درجہ بندی ٹی پاکستان نا درجہ بندی ٹی نمان گچینی ءِ ہراڑآن پاش مریک کہ نیب وڈی خوری نا توننگ کن گچین گام گیج کننگ ءِ۔
