اسلام آباد۔ 24اکتوبر (اے پی پی) بنجائی سیکرٹری اطلاعات و نشریات شفقت جلیل پارینے کہ پریس انفارمیشن ڈیپارٹمنٹ (پی آئی ڈی) ٹی لگوک آ خاخر نا معاملہ نا جاست وپاست ءِ کننگک، خاخر آن داوخت اسکان ہچ ءُ جانی نسخان اسے نا احوال رسینگتنے ولے پی آئی ڈی نا اسہ آفیسر اس ٹھپی مسنے۔ خاخر نا مون ءِ توننگک تو دا بابت حالیت صفا مریک۔ او چارشنبے نادے پی آئی ڈی نا پیشن میڈیا تون ہیت وگپ کریکہ۔ داوخت آ پی آئی ڈی نا آفیسر آک، عملہ، پولیس، سی ڈی اے، فائر بریگیڈ نا عملہ و الس نا اسہ بھلو کچ اس ساڑی ئسر۔ سیکرٹری اطلاعات پارے کہ پی آئی ڈی ٹی لگوک آ خاخر نا جاست و پاست ءِ کننگک۔ اوپارے کہ پی آئی ڈی ٹی لگوک آ خاکر ءِ مانیٹر کننگ انگ ءِ، خاخر آن داوخت اسکان ہچ ءُ جانی نسخان اس متنے ولے پی آئی ڈی نا اسہ آفیسر مقبول احمد ٹھپی مسنے ہرادے دمدستی وڑاٹ ہسپتال آ مون تننگانے و پی آئی ڈی نا ملازم آک باالکل ٹھیک ٹھاک ءُ ۔ اوپارے کہ خاخر ءِ کسفنگ کن فائر بریگیڈ نا ٹیم موقع غا سرمسنے و او خاخر ءِ کسفنگ اٹی اختہ ءُ۔ اوپارے کہ خاخر نا ہندن کہ مون ءِ توننگک تو اوکان پد حالیت واضح مریک۔ داکان مست پریس انفارمیشن ڈیپارٹمنٹ (پی آئی ڈی) نا ڈائریکٹوریٹ آف الیکٹرانک میڈیا نا کمرہ ٹی اناگت خاخر لگا ، بلڈنگ آن سنارکل نا کمک اٹ خلقت ءِ کشنگ انگ ءِ ۔ خاخر نا مول مُر آن خننگ انگ ءِ، خاخر لگنگ آن پد پی آئی ڈی نا بلڈنگ ءِ خورک کرفنگا ۔ خاخر آن ڈائریکٹوریٹ آف الیکٹرانک میڈیانا کمرہ ءِ نسخان رسینگانے و کمرہ ٹی دفتری کاغد آک ہشنگسا بھس مسنو۔ خاخر نا مول انا سوب گڑاس بندغ نا حالیت خراب مس ہرافتے دمدستی وڑاٹ خڑک انا ہسپتال آ گدریفنگا ولے اوفتا حالیت گڑتی آن پیشن ءِ۔ داوخت آ سی ڈی اے و ایم سی آئی نا ڈپٹی ڈائریکٹر ملک سلیم آن ہرفنگا تو او ’’اے پی پی‘‘‘ ءِ پارے کہ سی ڈی اے و ایم سی آئی نا عملہ واقعہ نا مسٹ آن پد موقع غا سرمسر و خاخر ءِ کسفنگ اٹی اختہ مسر۔ اوپارے کہ 7 خاخر ءِ کسفوک ءُ گاڈی ، فائر بریگیڈ نا عملہ و ایلو پی آئی ڈی ٹی لگوک آ خاخر ءِ کسفنگ اٹی اختہ ءُ۔
