سعودی عرب اٹی وزیراعظم عمران خان ءِ ملوک آ شرف مسلم امہ ٹی پاکستان نا ہند ءِ ظاہر کیک، بنجائی وزیر اطلاعات و نشریات چوہدری فواد حسین
اسلام آباد۔ 23اکتوبر (اے پی پی) بنجائی وزیر اطلاعات و نشریات چوہدری فواد حسین پارینے کہ سعودی عرب اٹی وزیراعظم عمران خان ءِ ملوک آ شرف مسلم امہ ٹی پاکستان نا ہند ءِ ظاہر کیک، آصف زرداری سیاست دان تا جاگہ غا وکیل آتون اوڑدہی تے اولیت ایتے، قرارداد آتے اٹ حکومت آک ہمپسہ، داڑکن وونٹ درکار مریک، او نوٹ انا چکر اٹ وونٹ آتے آن دوتے سلانے۔ دوشنبے نادے تینا ٹویٹ اٹی وزیراعظم عمران خان نا سعودی عرب نادورہ نا بابت بنجائی وزیر اطلاعات پارے کہ سعودی عرب اٹی ہرا شرف وزیراعظم عمران خان ءِ ملک او ظاہر کیک کہ اللہ نا مہربانی اٹ اینو مسلم امہ ٹی پاکستان نا انت ہند اسے و عمران خان ءِ مسلم امہ انت اہمیت اس ایتک۔ اوپارے کہ وزیراعظم عمران خان سعودی عرب نا دورہ ٹی بیرہ منہ گھنٹہ آرام کننگ کرینے، اونا مچ آ دے اختہ ئس۔ وزیراعظم عمران خان نا اختہ ہی تیٹی زرکاری کانفرنس اٹی بشخ ہلنگ، خادم الحرمین شاہ سلمان و ولی عہد و زرکارآتون اوڑدہی اوار ءِ۔ آصف علی زرداری و مولانا فضل الرحمان نا اوڑدہی نا بابت تینا جتاءُ ٹویٹ اسے ٹی بنجائی وزیر چوہدری فواد حسین پارے کہ زرداری صاحب سیاست دان تا جاگہ غا وکیل آتون اوڑدہی تے اولیت ایتے، دامفت مشورہ نا احساس اودے ہفتہ ٹی آخا دے تیٹی مریک۔ اوپارے کہ قرارداد آتے اٹ حکومت آک ہمپسہ ، داڑکن وونٹ درکار مریک و زرداری صاحب تون داسہ بیرہ نوٹ اس سلیسونو، اونوٹ کٹنگ نا چکر اٹ وونٹ آتے آن دوتے سلانے۔
