ٹرانسپورٹ و مواصلات نا بشخ راجی و اقتصادی شونداری ٹی کلیدی کڑد ادا کننگ ءِ
اسلام آباد۔ 23اکتوبر (اے پی پی) بنجائی وزیر ڈٹ بندی ، شونداری و اصلاحات مخدوم خسرو بختیار پارینے کہ ٹرانسپورٹ و مواصلات نا بشخ ملک انا راجی و اقتصادی شونداری ٹی کلیدی وڑنا کڑد ادا کننگ ءِ ، پیداوار اٹی ودکی کن گچین وکاریمی ٹرانسپورٹ نا نظام و پوسکن آ بنداوی ڈھانچہ المی ءِ۔ داخیال آتا درشانی ءِ او تدوک آدے سنٹرل ڈویلپمنٹ ورکنگ پارٹی نا دیوان اٹی کرے۔ اوپارے کہ ساڑی آ حکومت ملک اٹی اطلاعات نیٹ ورک، بنداوی ڈھانچہ ، توانائی ، صنعت، کشت وکشار، سیل و سوات و چندی ایلو بشخ آتیا اولیتی بنداو تیا چکار کننگ ءِ ، داڈٹ آتا پوروی آن پاکستان شونداری نا کسر اٹی اہم مزل اسے آ سرمریک ، ہراتم داڈٹ آک ایسری اسکان سرمریرہ تو اسہ بدلینگوک ءُ پاکستان اس مون آ بریک ہرانا الس ءِ توانائی ، مواصلات ، ہن و بر، صنعت وحرفت ، کاروبار، روزگار ، سیل و سوات و بے شمار اقتصادی شونداری نا آسراتی و وارخواہی دوبریک وپاکستان اقوام عالم اٹ شون ہلوک آ ملک آتا صف اٹ سلک۔ سنٹرل ڈویلپمنٹ ورکنگ پارٹی نا دیوان اٹی ٹرانسپورٹ اینڈ کمیو نیکیشن نا ڈٹ آتا منظوری ءِ تننگا۔ دیوان اٹی ٹرانسپورٹ و مواصلات نا بشخ اٹی 67953ملین روپئی نا خڑچ انا پشاور میٹرو بس انا ڈٹ ءِ پیش کننگا ہرانا مسخت پشاور نا الس ءِ گچین سفری آسراتی میسر کروئی ءِ۔ ڈٹ پورو منظوری کن ایکنک آ گدریفنگانے۔
