اسلام آباد۔ 23اکتوبر (اے پی پی) بنجائی وزیر جان جوڑی عامر محمو دکیانی 15آن 27 اکتوبر سورک نا برخلاف جاری مہم نا جاچ ءِ ہلنگ کن ترلائی خلقی آ جان جوڑی نا بنجاتا دورہ ءِ کرے و قومی انسداد سورک مہم نا جاچ ءِ ہلک۔ سورک مہم نا اہمیت آ زور شاغا و مہم ءِ سرسہب جوڑ کننگ نا گام گیج آتا جاچ ءِ ہم ہلک۔ داوخت آ بنجائی وزیر جان جوڑی پارے کہ حکومت سورک مہم اٹی 9 تُو آن 59 تُو انا یعنی 5سال اسکان نا وئی نا 3کروڑ 20لکھ چناتے سورک آن بچفنگ نا ٹیکہ خلنگک۔ اوپارے کہ ساڑی آ حکومت پاکستان نا چناتے جان جوڑ آخبت اس تننگ کن پرعزم ءِ۔ ننا چناک اسہ رکھ ءُ جان جوڑ آخبت اسے نا حقدار ءُ و دا ننا اسیجائی زمواری ءِ کہ تندرستی و رکھوک پاکستان اس جوڑ کننگ کن گام گیج کین۔ بنجائی وزیر جان جوڑی پارے کہ سول سوسائٹی، میڈیا و لمہ و باوہ غاک حکومت تون کمک کیر و لمہ و باوہ تینا چناتے سورک آن بچفنگ نا ٹیکہ ضرور خلفر تانکہ نن تینا چناتے جان جوڑ آخبت اس تننگ کین۔ اوپارے کہ وزیراعظم عمران خان نا وژن نا رداٹ جان جوڑی و تعلیم نا بشخ اٹی گچینی اتنگ ننا اولیت ءِ۔ جان جوڑی نا بشخ اٹی گچینی اتنگ کن پبی گام گیج کننگ اُن۔ حکومت سورک نا بچفنگ نا ویکسین مفت تننگ ءِ و سورک مہم نا سرسہبی کن صوبہ غاتون پبی کمک کینہ۔ وزیر جان جوڑی سورک مہم نا سرسہب اڈتننگ و کمکاری آ یونیسیف جہانی ادارہ جان جوڑی و گاوی نا منت واری ءِ ہرفے۔
