ریاض ۔23اکتوبر (اے پی پی) مزن وزیر عمران خان ءَ گوشت کہ پاکستان ءُُ بھارت ءِ نیام ءَ ایمنی سک باز المی اِنت تانکہ اے گپ ءِ دلجمی بہ بیت کہ دوئیں ملک آنی مڈی وتاس آنی جوڑیشت ءِ تاچ ءَ بیران کنگ ءِ مٹ ءَ بنی آدم آنانی نیمگ ءَ ترینگ بہ بیت۔ آئی ءَ اے گپ سئے شمبے ءِ روچ ءَ نامداریں کاروباری سروک ءُُ سرمایہ کار آنی میاں اوستمانی کانفرنس ءَ جستانی پسو ءَ دیان ءَ گوشت اَنت۔ 23ءَ چہ 25 اکتوبر ءَ تاں ریاض ءَ ’’ آیوکیں سرمایہ کاری ءِ موہ‘‘ ءِ بُن گپ ءِ سر ءَ برجم داشتگیں کانفرنس ءَ جستی دیوان ءِ ساھت ءَ گپ ءُُ تران کنان ءَ مزن وزیر ءَ گوشت کہ بھارت ءِ گوما ایمنی ناں ایوک ءَ پاکستان بلکینگ ءَ بھارت ءِ واستہ ھم المی اِنت۔ برورد یا کٹ آنی دلگوشت بنی آدم آنی مڈی ءُُ آسراتی ءِ نیمگ ءَ بہ بیت، وتاس آنی جوڑیشت ءِ تاچ ءَ گوں سر مہ سر اَنت۔ آئی ءَ گوشت کہ پاکستان ءِ واستہ بھارت ءُُ اوگانستادن ءِ گوما ایمنی ءُُ برجائی المی اِنت۔ آئی ءَ گوشت کہ مزن وزیر ءِ سیٹ ءِ نندگ ءَ پد آئی ءَ بھارت ءَ گوں دوستی ءُُ یکوئی ءِ دست شھارتگ بلے بھارت ءِ نیمگ ءَ اے جوانیں کار ءِ ایچ پسو دیگ نہ بوتگ۔ عمران خان ءَ گوشت کہ آ پھم ایت کہ بھارت ءَ لس گچین کاری بوھگی اَنت ءُُ بد بھتی ءَ پاکستان ءِ ھلاپ ءَ بیان بیازی کنگ ءِ مول ءُُ مراد ءَ لس گچین کاری ایشی ءِ ٹوھیں سبب اِت۔ آئی ءَ گوشت کہ ما لس گچین کاری ءِ ودار ءَ کن آں ءُُ بھارت ءِ گوما جوانیں ایمنی ءُُ برجائی ءِ امیت ءَ دار آں۔ عمران خان ءَ گوشت کہ اوگانستان ءَ ایمنی پاکستان ءِ واستہ المی اِنت۔ آئی ءَ اوگانستان ءَ ایمنیں گامگیج آنی گوما ھمبراہ داری ءِ واستہ حکومت ءِ جزم ءِ درشان کت۔ آئی ءَ گوشت کہ پاکستان ءَ توامیں شریک یکجاہ اَنت ایمنی ءُُ برجائی ءَ چہ ڈنی سرمایہ کار ی کئیت ءُُ گریبی ءِ تہ ءَ کمی بیت ءُُ ورنا آنی واستہ روزگار پکو بیت۔
