چین ءِ سینٹرل ٹیلی ویژن ءِ ڈپٹی ڈائریکٹر ژانگ شیلی ءِ سروکی ءَ ڈل ءَ اے پی پی ءِ جتا جتائیں شوبگ آنی تر ءُُ تاب کت، ایگزیکٹو ڈائریکٹر اختر منیر ءَ ڈل ءَ را ’’اے پی پی‘‘ ءِ انتظامی کوکا ءُُ ایشی ءِ کرد ءِ بابت ءَ سرپد کت، چینی ڈل ءِ باسک چینی میڈیا ءِ کمک ءُُ کمیونیکیشن پروگرام ءِ چیر دستی ءَ پاکستان ءِ تر ءُُ تاب ءَ کنگ ءَ اَنت
اسلام آباد ۔ 22 اکتوبر (اے پی پی) چینی میڈیا ءِ یک ڈلے ءَ راجی ھال رسانکی ادارگ ایسوسی ایٹڈ پریس آف پاکستان (اے پی پی ) ھیڈکوارٹر ءِ تر ءُُ تاب کت ءُُ سرکاری نیوز ایجنسی ءِ گوما کمکی کار آنی سر ءَ ھیال ریچی کت۔ چینی ڈل ءِ باسک چینی میڈیا ءِ کمک ءُُ کمیونیکیشن پروگرام ءِ چیر دستی ءَ پاکستان ءِ تر ءُُ تاب ءَ کنگ ءَ اَنت۔ چین ءِ سینٹرل ٹیلی ویژن ءِ ڈپٹی ڈائریکٹر ژانگ شیلی ءِ سروکی ءَ ڈل ءَ اے پی پی ءِ جتا جتائیں شوبگ آنی تر ءُُ تاب کت۔ اے موہ ءِ سر ءَ آئی ءَ اے شوبگ آنی کار ءِ بابت ءَ بریفنگ دیگ بوت۔ ’اے پی پی‘‘ ءِ ایگزیکٹو ڈائریکٹر اختر منیر ءَ ڈل ءَ را ’’اے پی پی‘‘ ءِ انتظامی کوکا ءُُ ایشی ءِ کرد ءِ بابت ءَ سرپد کت۔ ڈل ءَ را گوشگ بوت کہ اے پی پی پاکستان ءِ نامداریں نیوز ایجنسی اِت ایش الس ءَ را راستیں، مکسد والا ءُُ یک شلیں ھال پُجارین ایت۔ اختر منری ءَ گوشت کہ ’’اے پی پی‘‘ الس ءَ را آوانی کش ءُُ کرّ ءَ بوھوکیں واکیہ آناں وھدءُُ پاس ءِ سر ءَ پُجارینگ ءَ گوما پاکستان ءِ بیانی ءُُ ایشی ءِ گواچنی پجار ءَ را میاں اوستمانی پڑ ءَ سہرا کنگ ءَ انت۔ ڈائریکٹر نیوز ءَ وتی سرجمیں بریفنگ ءِ تہ ءَ ڈل ءَ را گوشت کہ ’’اے پی پی‘‘ انگریزی، اردو، سرائیکی، سندھی، پشتو، عربی، بلوچی ءُُ براہوئی زبان ءَ نیوز سروس ءَ ھوار فوٹو اور ویڈیو نیوز سروسز پُجارینگ ءَ اِنت۔ بُنجاھی دارالحکومت ءَ وتی ہیڈ کوارٹر ءِ گوما ایسوسی ایٹڈ پریس آف پاکستان ءِ ملک ءِ توامیں ٹوھیں شہر آنی بیورو ءُُ اسٹیشنز است اَنت وھدیکہ میاں اوستمانی کوریج ءِ واستہ ’’اے پی پی‘‘ ءِ چین ءَ ھوار جتا جتائیں ملک آنی تہ ءَ نماھندگ ھم است اَنت۔ ڈائریکٹر نیوز ءَ گوشت کہ ’’اے پی پی‘‘ ملک ءِ پجار ءَ را دیمروئی دیگ ءَ اِنت ءُُ میا اوستمانی ءُُ دمگی کار آنی سر ءَ جوانیں لیکہ آناں سہرا کنگ ءِ مینڈیٹ ءِ چیر دستی ءَ کار کنگ ءَ اِنت۔ ’’اے پی پی‘‘ ءَ بازیں در ملکی ھال رسانکی ایجنسی آنی گوما ھال آنی یک ءُُ دگر ءَ دیگ ءِ منوگری کتگ ایشی ءِ چیر دستی ءَ ارزشتی ایں ھال، فوٹو ءُُ وژیول نیوز سروسز یک ءُُ دگر ءَ دیگ بوھگ ءَ اِنت۔ آئی ءَ گوشت کہ ’ ’اے پی پی‘‘ ءِ تنج ءِ سر ءَ سیاست، لیب ءُُ گوازی، دود ءُُ ربیدگ، جان سلامتی، وانگ ءُُ زانگ ءُُ پارلیمانی کوریج ءَ ھوار جتا جتائیں شوبگ آنی ھال آں جاڑی کنت۔ ڈل ءِ باسک آں ’’اے پی پی‘‘ ءُُ ایشی سیادی داروکیں ادارگ آنی نیام ءَ کمک ءِ دیمروئی ءِ سر ءَ تپاک کت ءُُ ’’اے پی پی‘‘ ءَ را chinadaily.com.cn ءِ کمک ءِ ھم پیشکوی گوشت۔ ’’اے پی پی‘‘ ءِ ڈائریکٹر انفارمیشن ٹیکنالوجی محمد غواث خان ھم موہ ءِ سر ءَ ساڑی ات۔ میڈیا گشتانکار آنی پاکستان ءِ دو روچی تر ءُُ تاب ءِ بندوبسست چین ءِ کیونسٹ پارٹی ءِ سینٹرل کمیٹی ءِ شوبگ پبلسٹی ءَ ’’بیلٹ اینڈ روڈ‘‘ ءِ رد ءَ میڈیا ءِ نیام ءَ کمک ءُُ رابطہ آنی دیمروئی ءِ واستہ کوشست آںی رچ ءَ کتگ۔ ڈہل ءَ ڈپٹی ڈائریکٹر چائنہ سینٹرل ٹیلی ویژن ژانگ شیلی، ڈپٹی ڈائریکٹر چائنہ ریڈیو انٹرنیشنل چین پینگ، ڈپٹی ایڈیٹر انچیف چائنہ ڈیلی ویب سائیٹ ژانگ چن یان، ڈپٹی ڈائریکٹر چائنہ نیوز ویب سائیٹ تاؤ گوآنگ ژیانگ، ڈپٹی ایڈیٹر انچیف ژن ہوا نیٹ لی جی وان، ایڈیٹر انچیف پیپلز ڈیلی ویب سائیٹ یو کنگ چو، ڈپٹی ڈائریکٹر پریس بیورو، پبلسٹی ڈیپارٹمنٹ آف سی پی سی سینٹرل کمیٹی وین جی، انوسٹی گیٹر پبلسٹی ڈیپارٹمنٹ آف سی پی سی سینٹرل کمیٹی مان بن، ممبر آف پریس، پبلسٹی ڈیپارٹمنٹ آف سی پی سی سینٹرل کمیٹی ءِ ممبر رین مینگ ءُُ ممبر آف پریس، پبلسٹی ڈیپارٹمنٹ آف دی سی پی سی سینٹرل کمیٹی پینگ فی ھوار اتنت۔
