اسلام آباد۔ 22 اکتوبر (اے پی پی) مزن وزیر عمران خان دو شمبے ءِ روچ ءَ دو روچی سرکاری تر ءُُ تاب ءِ ھاترا سعودی عرب ءَ روادگ بوت۔ وزیر ءِ درئی کار شاہ محمود قریشی ، وزیر ءِ ھزانگ اسد عمر، وزیر ءِ اھوالکاری چوہدری فواد حسین، مشیر تجارت عبدالرزاق داود ھم مزن وزیر ءِ ھمبراہ اتنت۔ مزن وزیر عمران خان سعودی فرماں روان شاہ سلمان بن عبدالعزیز ءِ دعوت ءِ پد ءَ سرمایہ کاری کانفرنس ءَ بھر زوری کنگ ءِ واستہ سعودی عرب ءِ دو روچی تر ءُُ تاب ءَ انت۔ آ ریاض ءَ ’’ آیوکیں باندات ءَ سرمایہ کاری ءِ موہ’’ ءِ بُن گپ ءِ پد ءَ یک میاں اوستمانی کانفرنس ءَ بھر زوری کنت۔ عمران خان ءَ را تر ءُُ تاب ءِ دعوت ھاسیں رنگ ءَ شاہ سلمان بن عبدالعزیز ءَ داتگ۔ کانفرنس ءَ دُگنیا ءَ چہ نامدار یں سوداگر ءُُ کاروباری مردم ۔ سرمایہ کار، ٹوھیں کاروباری کمپنی ءُُ ہائی ٹیک انڈسٹری ءِ نماھندگ بھر زوری کنگ ءَ انت۔ کانفرنس ءَ را ’’ صحرا میں ڈیوس‘‘ ءِ نام دیگ بوتگ۔ اے کانفرنس اے ارزشتی ایں کاروباری سروک آنی گوما رابطہ ءِ موہ ءَ پُجارین ایت ھما کہ پاکستان ءِ سرمایہ کاری ءِ واھشت مند انت۔ مزن وزیر عمران خان سعودی فرمانروا شاہ سلمان ءُُ ولی عہد محمد بن سلمان ءَ گوں گند ءُُ نند کنت اِنت ایشی ءَ چہ وت مہ وتی یکوئی ءِ کار آنی سر ءَ ھیال ریچی کنگ بیت۔ مزن وزیر پاکستان عمران خان کانفرنس ءِ ساھت ءَ پاکستان ءِ ھوالگ ءَ برجم داشتگیں سیشن ءَ بھر زوری ءُُ گشتانک دنت۔ اے سیشن ءِ بُن گپ ’’ پاکستان دمگی دیمروئی ءُُ برجائی ءِ بُنجاہ‘‘ اِنت۔ بھر زوروک ءُُُ گوشداروکیں مردم آنی تہ ءَ دُگنیا ءِ نامداریں کمپنی آنی چیف ایگزیکٹوز ءُُ آوانی نماھندگ ھوار اَنت۔
