بھارت کشمیری الس نا است خواہی تا رداٹ کشمیر نا متکن آ جھیڑہ ءِ ایسر کے، وخت بسنے کہ بھارت اقوام متحدہ نا سلامتی کونسل نا قرارداد و کشمیری الس نا است خواہی نا رداٹ ہیت و گپ انا کمک اٹ کشمیرنا جھیڑہ نا ایسری نا کنڈآ پیش رفت نا احساس ءِ کے، وزیراعظم نا ٹویٹ
اسلام آباد۔ 22اکتوبر (اے پی پی) وزیراعظم عمران خان مقبوضہ کشمیر اٹی بھارتی سیکورٹی فورس آتا دوتے اٹ بے گناہ کشمیری تا لس خون نا پوسکن آ چرجوئی نا ترندی اٹ مذمت ءِ کرسا بھارت آ زور شاغانے کہ او کشمیری الس نا است خواہی تا رداٹ کشمیر نا متکن آ جھیڑہ ءِ ایسر کے۔ او کلگام نا علاقہ ٹی بیدادی نا پوسکن آ لہر نا بابت خبر تیا ردعمل نا درشانیءِ کریکہ ہراٹی بھارتی فوج اتون جھیڑہ ٹی کم و ود 9 شاری شہید و 50ؓ آن زیات ٹھپی مسنو۔ وزیراعظم دوشنبے نادے تینا ٹویٹ اٹی پارے کہ وخت بسنے کہ بھارت اقوام متحدہ نا سلامتی کونسل نا قرارداد و کشمیری الس نا است خواہی تا رداٹ ہیت وگپ انا کمک اٹ کشمیر نا جھیڑہ نا ایسری نا کنڈآ پیش رفت نا احساس ءِ کے۔ یات سلے کہ او آئی سی نا وت واجہ آخبتی انسانی حق کمیشن ہم تینا اسہ ساڑی ءُ بیان اسے ٹی مقبوضہ کشمیر اٹی کودک کشمیری مسلمان تا برخلاف بھارتی سیکورٹی فورس آتا کنڈآن دہشت گردی نا جاری لہر آ گڑتی نا درشانی ءِ کرینے۔ بیان اٹی پاننگاکہ بھارتی کوزہ گر فوج بیدادی، من مانی دزگیری و زالبول و چناتتون اوار ہزار آ بے گناہ شاری تا غیر کانودی لس خون نا کمک اٹ کشمیری الس نا توار ءِ توننگ کن ہروڑنا استبدادی پالیسی تے بے دریغ کاریم اٹ ایسونے۔ داکان بیدس سرینگرآن ملوک آ احوال تارداٹ کشمیر نا سویلی ضلع کلگام اٹی شاری تے شہید کننگ نا برخلاف اسیجامزاحمت قیادت (جے آر ایل) نا کال آوادی کشمیر اٹی پورو ہڑتال کننگ انگ ءِ۔
