مچ آ ملک اٹی ڈٹ انا شاندار السی است بڈی، فارم60 دے اسکان بشمول ہفتہ و یک شنبے جمع کرفنگ مریک
اسلام آباد، فیصل آباد، کوئٹہ ، سکھر، سوات، مظفر آباد، گلگت اٹی رجسٹریشن 21دسمبر اسکان برجاسلک
اسلام آباد۔ 22 اکتوبر (اے پی پی) وزیراعظم نا پوسکن آپاکستان تینا اُرا ہاؤسنگ پروگرام بناکرینے، مچ آ ملک اٹی داڈٹ ءِ شاندارالسی است بڈی ملانے و خلقت نا داڈٹ اٹی است خواہی نا سوب نادرانا مقرر کروک سینٹر آتیا سہب اتون ہی خلقت نا ہِننگ و بننگ زیات ئس۔ نادرا نا کنڈآن جاری بیان نا رداٹ الس نا آسراتی تا رداٹ فارم 60 دے اسکان بشمول ہفتہ و یک شنبے جمع کرفنگ مریک۔ ترجمان الس آن خواست کرے کہ او آسراتی تا رداٹ گچین کروک ضلعی ہاؤسنگ پروگرام آفس اٹی بریر تانکہ رش انا سوب اوفتے تکلیف مف۔ ہاؤسنگ پروگرام نا دا اولیکو مرحلہ ءِ ہراٹی ہفت جتا کروک ضلع غاتے ٹی تینا اُراجوڑ کننگ نا است خواک بشخ ہلیرہ۔ خاہوت اٹی بیرہ اسہ ہی بندغ نا رجسٹریشن ءِ امنا کننگک۔ نادرا نا بلیو ایریا ٹی میگا سینٹر نا پیشن سہب اتون ہی خلقت نا بھلو کچ ا س جمع ئس و زالبول و نرینہ غاتا جتا جتا لین لگا، ہندی پولیس و نادرا نا سیکورٹی اسٹاف الس ءِ کنٹرول کننگ کن متحرک ئس۔ پوسکن آ پاکستان ہاؤسنگ پروگرام نا اولیکو مرحلہ ٹی اسلام آباد تون اوار 7 شارتے ٹی رجسٹریشن نا بناءِ کننگانے۔ بنجائی دارالحکومت اٹی مسہ بنجا ٹہیفنگانے۔ اولیکو مرحلہ ٹی اسلام آباد، فیصل آباد، کوئٹہ، سکھر ، سوات، مظفرآباد وگلگت اٹی کم کٹیا کروک آ بندغ آتے کن رجسٹریشن نا بناءِ کننگا ہرا 21دسمبر اسکان برجاسلک۔ ایلو ضلع غاتے ٹی رجسٹریشن نا پڑو ءِ 21دسمبر آن پد کننگک۔ کوئٹہ و اسلام آباد اٹی مسہ مسہ بنجاتیا رجسٹریشن مریک۔ رجسٹریشن فارم تون اوار 250 روپئی فیس جمع کرفنگ المی مریک۔
