اسلام آباد۔ 22اکتوبر (اے پی پی) وزیر مملکت داخلہ شہریارآفریدی پارینے کہ پاکستان آغٹ انا حق ءِ ، خلقت تینا اُراکن ترسائنگارہ، پوسکن آ پاکستان ہاؤسنگ پروگرام الس نا تغ تا تعبیر ءِ، ڈٹ انا ریگولیٹری باڈی ءِ زوت جوڑ کننگک، ملک آ مستین اٹی وام تا بھاریم ءِ بٹنگسا ہناولے اسٹ اس ہم الس نا سجفتو۔ دوشنبے نادے نادرا میگا سینٹر بلیو ایریا ٹی پوسکن آ پاکستان ہاؤسنگ اسکیم پروگرام نا بناءِ کننگ نا وخت آ تران کرسا وزیر مملکت داخلہ شہریار آفریدی پارے کہ دا وزیراعظم عمران خان و پوسکن آ پاکستان نا ہند ن ءُ ڈٹ اسے ہرا ہمو پاکستانی تے کن بناکننگانے ہرافتے وخت اس ہم تینا سمجھنگ تنے ، اوفتے کانود نا آڑاٹی تنگ کریر ولے اوفتے کن آسانی ودی کننگتو۔ ہر انسان نا خواہش مریک کہ اودے اسہ ہندن ءُ چھت اس ملے ہرانا کیرغ آن او عزت اٹ تینا زند ءِ تدیفنگ کے۔ اوپارے کہ لس بندغ ءِ بھاز انگا مشکل آتون مون تروکی ءِ۔ او بنداوی آسراتی تیان محروم ءُ و سکسا سکسا زند ءِ تدیفنگ ءُ۔ پی ٹی آئی نا حکومت الس ءِ بنداوی آسراتی تا فراوانی کن کوشست کننگ ءِ۔ ملک اٹی اسہ کروڑ اُرانا گرج ءِ ، ہرسال پنچ لکھ اُراجوڑ کروئی مریک۔ مستین اٹی ملک آ وام تا بھاریم ءِ بٹنگا و اسٹ اس ہم نیزگار تا سجفتو۔ پیسہ سوگو مفننگ نا سوب نیزگار آ بندغ اُراجوڑ کننگ کپک۔ نن آزمائش و مشکل ءُ دور اسے آن گدرینگ انگ اُن ولے لس بندغ نا مشکل آتیٹی آسانی کن سجفنہ تو کسرتینٹ جوڑ مریک۔ پاکستانی قوم جفاکش و خواری کش ءءُ و داانتظار اٹی ئسر کہ اوفتے تینا سمجھنگے۔ پوسکن آ پاکستان ہاؤسنگ پروگرام نا رداٹ ون ونڈو سروس نا کمک اٹ کم انگا نرخ اٹی الس ءِ آسراتی فراوان کننگک۔ اوپارے کہ ڈٹ انا پنی مننگ و گرج آتا اندازہ ءِ داڑآن خلنگ مریک کہ نادرا نا دفتر آتا پیشن نن آن ہی لین تا لگنگ بناکرے ۔ تنقید کننگ و مسخرہ خلنگ بھاز آسان ، کاریم کرسا نشان تننگ مشکل ءِ ۔ ہراتم نن حق و راست انا کسر آ مرینہ تو اللہ تعالیٰ کمک ءِ کیک۔ داڈٹ آن کسب کارو بے کسب کار بندغی واک ءِ روزگار ملک و الس نا ریاست آ پت ودک۔ اوپارے کہ پوسکن آ پاکستان ہاؤسنگ اسکیم نا ریگولیٹری باڈی زوت جوڑ مریک۔ الس پت کے اوفتا حق ءِ حلال نا کٹیا نا اسہ اسہ پائی نا نن زموار اُن۔ پاکستان غٹ انا ءِ و غٹ تپہ غاتا داڑآ حق ءِ۔ حکومت تینا اولیکو 100 دے ٹی اسہ ہندن ءُ ڈٹ اسے نا بناءِ کرے ہراڑکن الس ترسائنگاکہ۔ بے روزگاری لس ءِ و ورناک فریشان ءُ۔ نن داڈٹ ءِ ایسری اسکان سرکننگ کن پرعزم اُن۔ اسہ سوج اسے نا ورندی ٹی اوپارے کہ پاکستان تحریک انصاف کے پی کے ٹی 2013ء نا مقابلہ ٹی ساڑی آ گچین کاری ٹی دوگنا وونٹ ہلک۔ 2023ء نا گچین کاری ٹی مچ آ پاکستان اٹی داکان زیات سرسہبی دوئی کینہ۔ داکان مست اوفیتہ ءِ کاٹ کرسا اسکیم نا بناءِ کرے و فارم جمع کرفنگ کن بروک آ شاری تتون ہیت کرسا اوفتا مشکل آتا جاچ ءِ ہلک و نادرا کمامدارآتے شاری تے ہروڑآسراتی فراوان کننگ نا پارت کرے۔
