سوات۔ 22اکتوبر (اے پی پی) وزیراعلیٰ خیبر پختونخوامحمود خان پارینے کہ سوات اٹی قیام امن آن پد پاک فوج انا کنڈآن سول انتظامیہ ءِ واک آتا باقاعدہ وڑاٹ منتقلی اسہ تاریخی ءُ موقع اسے ہرا سوات نا الس ءِ رکھوک و روشنا آخبت نا نوید اس تننگ ءِ۔ داخیال آتا درشانی ءِ محمود خان سوات نا سول انتظامیہ ءِ واک آتا منتقلی نا چرجوئی ٹی اڈ ہلوک آ خصوصی دود آن تران کرسا کرے۔ دود دوشنبے نادے اڈ ہلک ہراٹی کور کمانڈر پشاور لیفٹیننٹ جنرل عزیز احمد بٹ، آئی جی خیبر پختونخوا صلاح الدین و جی او سی سوات میجر جنرل خالد سعید تون اوار بڑزکو سول و فوجی کمامدارآک ہم ساڑی ئسر۔ محمود خان تیناتران اٹی پارے کہ اسہ دہائی اس مست دازیبا انگا وادی آ ملک دشمن عنصر آک تسلط کننگ نا کوشست کریر، دہشت گرد آک ننا کودک الس آ ہراظلم ءِ کریر او تینٹ دافتا عینی شاہد ءِ۔ او دور سوات نا الس کن اسہ مون ءُ دور اس ئس ولے اوفتا حوصلہ و سوات ءِ پرامن جوڑ کننگ نا عزم مثالی ئس۔ محمود خان پارے کہ دہشت گرد آک سوات نا راجی و معاشی نظام ءِ بے دردی اٹ بھس کریر، ننا تدریسی ادارہ غاتے بھس کننگا، زالبول آ ناجائز پابندی خلنگا و بے گناہ خلقت ءِ خلنگا، دہشت گرد آتا کارروائی تا سوب الس نا زند مشکل مسوسس، وزیراعلیٰ پارے کہ دامشکل وخت اٹی پاک فوج، پولیس و سوات نا الس اواری اٹ سوات ءِ دہشت گرد آتا وجود آن پاک کننگ کن بیش بہا قربانی تسر، الس و ادارہ غاک زندہ ءُ قوم اس جوڑ مرسا دہشت گرد آتا مون آ ناقابل شکست دیوال اس جوڑ مسر، خاص کر پاک فوج الس نا مخ تفی اٹ شجاعت نا ہرا لازوال داستان ءِ نوشتہ کریر اوفتا مثال ملیپک، محمود خان پارے کہ آپریشن آن پد ہم پاک فوج سوات اٹی حکومتی رٹ ءِ بحال کننگ و الس نا شرحالی کن سرجزآتے برجاتخا و الس دوست رویہ نا بدولت داجاگہ نا الس نا است ءِ کٹار، داسہ پاک فوج انا کمک اٹ پولیس و ایلو سول ادارہ غاک سوات نا حفاظت کن پوروی وڑاٹ تیار مسنو۔ دود اٹی سواب آپریشن نا 11سال پد فوج سول واک آتے باقاعدہ وڑاٹ سول انتظامیہ نا حوالہ کرے۔ انتظامی واک آتا منتقلی نا یات داشت کور کمانڈر وزیراعلیٰ نا حوالہ کرے وخت اس کہ سول واک آتا حوالگی نا نشان کمشنر ملاکنڈ ڈویژن و ریجنل پولیس آفیسر نا حوالہ کننگا۔
